شەفەق‌نیوز/ دۆماێ موعەرفی کردن دو کورد ئەڕا وەزیر بیین دە ئێران، باس و قسەێ فرەیێگ دە ئێران و شەواچەێل مەجازی کەفتە رێ.
بڕێ لە کاربەرەێل مەجازی ئوو بڕێ لە نمایەندەێل پارلمان ئێران فرە ئێراد و رخنەگری دکردن و دوتن ک ئی دوانە بەش چشتێ رزومەێ کاری ئەڕا وەزیر بیین نەدیرن.
دۆماێ ئی گوت‌وگوڕاێلە بڕێ لە چالاکەێل کورد تێهران و ئەو دووەێ شارەێلە ئەڕا کووەو کردن رای و دەنگ نمایەندەێل پارلمان هان و تەقەلا کردن.
ئمڕوو دیارییەو بی ک ئی دو کوردە توانستنە رای ئێعتماد پارلمانتارەێل ئێرانی بگرن و دش بکەنە کابینەی دەوڵەت.
دە ئی دەنگ و رای‌گیرییە
عیسا زارع‌پوور ک بی وە وەزیر ئرتباتات و فەناوری ئتڵاعات دەوڵەت سێزدەهم توانست دوسەد و پەنجا و شەش دەنگ‌وڕای پێشتەوان وەربکرێ ئوو هە ۱۷ کەس نواگر و نەهوەکەر داشت و ١٠ کەسیش بێ‌دەنگ‌وڕای بین دە وەراوەرێ.
حوجەت‌الله عەبدڵمەڵکی ک کریا وە وەزیر تەعاون، کار و رفاهی ئێجتماعی ئی دەوڵەتە‌یش، ۱۹۱ کەس هام‌پێشت داشت ئوو ۷۷ دەنگیش دژ وە ئەوی بین و ۱۳ کەسیش بێ‌دەنگ و ۵ گلەیش دەنگ‌وڕای باتڵە دریا ئەڕاێ.
سەرۆک کومار نووی نام دەوڵەتەگەێ خوەێ ناگە "دەوڵەت خەڵک".