دە ئی دانیشتنەێلە ئەوی دماپەسەنییەێل پارلمان و دەوڵەت و دادەوەری عراق دە بارەی داین حەق بنەماڵەێل شەهیدەێل و تەسفیر کریاگەێل کورد فەیلی لە عراق، ئەڕا وەردەنگەێلە چەکان و شییەو کرد و رێنموونییەیان کرد ک چوون دتوانن شوونگیری حەق و حوقووق خوەیان دە عراق بکەن.
بەرپرس موسسەی شوهەدا دە دۆمای قسەێلەێ خوەی وە نەخش کوردەێل فەیلی دە دامەزرانن حزبەێل عراق دوفێشتر پارتی دموکرات کوردستان و یەکیتی نێشتمانی کورد هشارەی کرد و ئمجا وت ئیمە شانازی دکەیمن ک هەمیشە هە مەزڵووم بیمنەو هیچ وەختێ زاڵم نەبیمنە.
طارق مەندەلاوی وت: شانازی ئیمەسە ک گشتێ دزانن یەکم ژن شەهید ئێعدامی دە عراق لەیلا قاسم فەیلییە و گشتێ دزانن یەکم شەهید سپای بەدر دەرسەڕ کردنێ وەرد ئەرتش بەعس کوردێگێ فەیلی بییە و یەکێ لە مناڵەێل کورد فەیلی بەدراوی لە یەکم شێخەێل شەهید عراقە وە بان ئی هەمگەوە ئی قسەێل کەڵەپیاگەێل دەوڵەتەێل و دادەوەرییەێل عراق وە دەنگ بەرزەوە واژا دکەمەو دویشم ک وتنە :"ئیمە شەرمەسار کورد فەیلییمن ک دۆمای چەنی چەن ساڵ لە داڕووخیان بەعس هێمانیش ک هێمانە کورد فەیلی هە تووش کێشە و حەق‌خوازییەێلێگە ک میرات شووم سەددامن" و هیواداریمن ک ئی شێوەێلە ک عراق و هەرێم گرتنەسەوەر و هەمیش هە وەو جوورە ک هەم سەرۆک عراق و هەم کاک مەسعوود بارزانی ئی دۆمادۆما فرەتر پاملەێ بینە حەق کورد فەیلی بدرێ و لەێ بێ‌سەر و شوونێ بدەرانە دەر.
ئەوی دە بەشێ لە قسەێلەێ دە بان دوروس کردن فیلمێگ دە بان ژینووساید کوردەێل فەیلی وە دەس بورهان ئەحمەدی و یارمەتی ئیلامییەێل قسە کرد و وت: ئیجوورە کارەێلێ هانامان ددەێ ک بتوانیمن فرەتر کاره‌ساتەێلێ ک وە سەر کورد فەیلی چگە بویشیمنەو ئوو قێشتر لە جاران حەق‌خوازی بکەیمن ئەڕا گەل و هووزەگەمان.
دە دۆماخر ئی دانیشتنەوە دوکتور عەبدسەمەد رەحمان سوڵتان، وەزیر ئەوساوین هجرە و موهاجرەی عراق، باس دە بان حەق کورد فەیلی کرد و وت: ئی دۆمادۆما دو دادەوەر نریانە ک دە بان کارەسات کورد فەیلی گشت چشتێ دزانن و هێمێداریمن ک یە خوەێ ببێگە بووت ئەوداین حەق کورد فەیلی.
دوکتور مەهین عەباسی لە لایەن جەرخەێ ئیلامیەێل تێهران "جەرخەێ جام" بڕێ لە رەنج بنەماڵەێل شەهید کورد فەیلی و تەسفیر و تەهجیر کریاگە وتەوەو و هەمیش داخواز کرد ک بەش ئی بەش‌خوریاگەێل بدرێگەوە.
دە ئاخر ئی دانیشتنەوە، خەڵکەگە قەیرێ لە دۆزەمەێل خوەیان لە باوەت نەداشتن ناسنامە و بەڵگەنامەێل وتنەو ئوو داخوازەێل خوەیان دان وە دەس مەندەلاوی.