شەفەق نیوز - هەولێر

وەزارەت خوەنین باڵا و توێژینەوەی زانستی لە هەرێم کوردستان، ئمڕوو یەکشەممە، وەرگردن 99% لە داواکارییەیل پێشکەشکریاگ، کە رەسێدە 39,950 داواکاری ئەرا دەرچگەیل قۆناغ شەشەم ئامادەیی ئەرا خوەنین لە زانکۆ و پەیمانگایەیل هەرێم ئەرا سال خوەنین 2026 - 2027 راگەیان.

لە وەخت کۆنگرەیگ رووژنامەوانی  وەزیر خوەنین باڵا و توێژینەوەی زانستی لە هەرێم، ئارام محەمەد قادر لە باڕەگای وەزارەتەگە لە هەولێر سازکریا  و پەیامنێر ئاژانس شەفەق نیوز  ئامادە بوی، ئەرا راگەیانن ئەنجامەیل وەرگردن دەرچگەیل قۆناغ ئامادەیی وە گشت لقەگانی.

وەزیرەگە لە وەخت کۆنگرەگە وت: "توانای  زانکۆیەیلمان فرە سنووردارە، باوجی سووربوین لەبان بەشداریکردن گشت دەرچگەیل قۆناغ ئامادەیی لە هەرێم وە وەرگردن"، و دیاریکرد، وەزارەت خوەنین باڵا داواکارییەیل پەیوەستبوین تایبەت وە 32,422 خوەنەوار لە دەرچگەیل  ئمسال  وەرگردیە، وەگەرد داواکارییەیل پێشکەشکریاگ لە دەرچگەیل سالەیل گوزەشتە، و 2,700 خوەنەوار لە دەرچگەیل ناوچەیل کوردستانی لە دەیشت ئیدارەی هەرێم.

ئاشکراکرد، تێکڕای شمارەی خوەنەوارەیل وەرگیریاگ رەسێدە 39,528 خوەنەوار، کە یەکسانە وە 99% لە تێکڕای پێشکەشکارەیل، لە وەختیگ شمارەی ئەو کەسەیلە کە وەرنەگیریاگە لە 317 خوەنەوار رەد نەویە، کە فرەیان لە نمرەی   55% وە خوارترە.

لەبارەی کۆلێژ و زانکۆ ئەهلییەیل، وەزیر خوەنین باڵا دیاریکرد، شمارەیگ فرە لە کورسیەیل لە زانکۆ و کۆلێژە ئەهلییەیل ئەرا ئەم سال تەرخانکریاس، و دووپاتکردن لەوەگ هویچ زانکۆیگ ئەهلی نیەتوانێد هویچ خوەنەواریگ وەربگرێد بی رەزامەندی پیشوەختە و فەرمی لە وەزارەت خوەنین باڵا.