شەفەق نیوز/ ڤیان دەخیل خانمە ئەندام پەرلەمان عراق، ئمڕوو پەنجشەممە،  داوا لە حکومەت فیدراڵی کرد بڕەسنە هانای نزیکەی ٧٠٠ خیزان ئەیزیدی ئاوارە، وەفرەگە لە کامپیگ لە کۊیەی شەنگال گیریان داگە.   

دەخیل ک خوەی قسەکەرە وەناو فراکسیۆن پارتی لە بەیاننامەیگ ئمڕوو وت:  لەوەر ئەو وەفەرە ک وەخەسی واریە بان کۊیەی شەنگال،  و لەوەر ئەو کەشوهەوای فرە سەردە ک ناوچەگە وەگشتی گردیەسە وەر، زیاتر لە ٧٠٠ خیزان ئەیزیدی لە خەڵک شەنگال هانە ناو کامپ سەردەشت لە بنار کۊێەی شەنگال،  لەوانەگ ماڵەیلیان رمیاگە و لەوەر پەلامار داعش تیرۆریست لە ٢٠١٤ ئاوارە بۊینە و ناچار بۊینە لەناوچەی سەردەشت بمینن.   

وتیش: ئیسەیش گشتیان لەناو وەفر گیر هاتنە بیچگە ئەو سەردی فرە، و هەوای سەردە، و زیان لە کەم کەرەستە وەخوەیان دۊنن، تایبەت نەفت چەرمگ و پەتو زمسانی و خوەراک و چشتەیلیگ تر.   دەخیل داوا لە حکومەت فیدراڵی و حکومەت پارێزگای نەینەوا کرد ئەرکەیل خوەیان وەرانوەر سەدان خیزان لە مناڵ و ژن و پیرەیل جیوەجی بکەن، ک لەناو ئی کامپە گیر هاتنە، و ریکارەیلیگ کوتپڕ وەخاتر رەسانن فریاکەفتن زۊینە وەپیان جیوەجی بکەن.   

خانمە پەرلەمانتارە ئەیزیدیەگە هەمیش داواکرد حکومەت فیدراڵی ئی گیچەڵ گەپە چارە بکەێد، و ئاوارەیلە وەرەو میلکان خوەیان گلەو بەێد، ئەوەیش وە جیوەجیکردن رێککەفتن شەنگال، ک لەناوبەین حکومەت فیدراڵی و حکومەت هەرێم کوردستان واژوو کریاگە، و ئەگەر جیوەجی بکریەێد، زیان هەفت ساڵی لە ئاوارەیی وە رەوشەیل سەختیگ تەواو بوود.