شەفەق نیوز/ ئەلینا رۆمانوسکی خانمە باڵیۆز ئەمریکا لە بەغداد، ئمڕوو شەممە، وت: ئەمریکا پشتگیری لە گشت تەقەلایل کەێد تا هەڵوژاردن سوو لە هەرێم کوردستان عراق ئازاد و پاک بوود.

لە پۆستیگ لەبان ماڵپەڕ ئێکس کە ئاژانس شەفەق نیوز لەلی ئاگادار بوی داوا گشت حزبەیل سیاسی و هیزەیل ئەمنی کرد رێز لە رۆڵ گرنگ راگەیانن و کۆمەڵگای شارستانی لە کار دیموکراتی کرد، و دویرکەفتن لە تونەڕەوی و رخبردن.

بڕیارە سوو یەکشەممە هەڵوژاردن پەرلەمان هەرێم کوردستان لە خول شەشەمی وەڕیەو بچوود.

شمارەی دەنگدەرەیل لە هەرێم کوردستان رەسێدە 2,899,578 کەس، 215,960 لەلییان ماف لە دەنگدان تایبەت دیرن کە دویەکە جمعە تەواو بوی، و ئەوەکان شمارەیان رەسێدە 2,683,618 کەس، لە دەنگدان گشتی سوو یەکشەممە دەنگدەن.

 1091 کاندید لە هەرێم کوردستان لە دوو رەگەز لەبان 100 کورسی رکابەری کەن، پەنج لەلییان  "كوتا"ی پیکاتەیلە، دویای ئەوە کە 11 کورسی بوی،ز وەبڕیار دادگای فیدڕاڵی باڵا کەمەو کریا.