شەفەق نیوز/ پارێزگای سلێمانی، شەوەکی ئمڕوو سێشەممە، گردەوبوین سەدان لە خانەنشینەیل لە وەردەم بانکەیل وەخوەی دی، کە ئەرا وەرگردن ئەو مووچەیلە هاتنە کە نزیکەی دوو مانگە دیر کەفتیە، لەناو دادکردن لەدەس میکانیزم بەشەوکردن و نەڕەسین پویل ئەرا بانکەیل.
پەیامنێر ئاژانس شەفەق نیوز لە سلێمانی وت: ئی قەرەباڵغ گەورە وەگەرد ئەوە تیەێد کە دویەکە دووشەممە، حکومەت هەرێم کوردستان لیست مووچەی مانگ تشرین دویەم گوزەشتە راگەیان، کە عیسا بڕ فرەیگ لە خانەنشینەیل وەی شەوەکی زویە روی وەرەو بانکەیل بکەن.
محمد ئەحمەد یەکیگ لە خانەنشینەیل ئەرا ئاژانس شەفەق نیوز وت: وەگەرد راگەیانن لیستەگە، دەیان لە خانەنشینەیل پیشمەرگە روی وەرەو وەڕیەوبەرایەتی خانەنشینی پیشمەرگە لە سلێمانی کردن، تا ناو خوەیان توومار بکەن، و کەسەیلیگ ترەک وەڕز درویژیگ وسیان لە ساعەت چوار شەفەقەو، تا بەشکی مووچە بگرن، و تا ئیسە بەشەوکردن مووچە دەسوەپی نەکردیە، لەناو کەشوهەوای سەرد و زیانداری فرەیگ لە خانەنشینەیل لە بیماریەیل درویژماوە.
ئەحمەد وتیش: گشت مانگیگ ئی کارە دووارەو بوود، کە هەمیشە تا ساعەت یەک نیمەڕو یا دویای ئەوە مووچە بەشەو کریەێد، کە مەینەتی ئی گەورە تەمەنەیلە قورسەو کەێد و ژیان بەدیان سەختترەو کەێد.
خانەنشینەیل لە هەرێم کوردستان، کەفنە روی رەوشەیل سەختیگ لەوەر دیرکەفتن خەرج مووچەیان و میکانیزم بەشەوکردنی کە وە مەینەتی باسی کەن، وەتایبەت لەی کەشوهەوای سەردە.