شەفەق نیوز/ خەسەخانەی دکتۆر جەماڵ ئەحمەد رەشید مناڵەیل لە سلێمانی، ئمڕوو دووشەممە، هووشداری وە پەلە ئاراستەی داڵگ و باوگەیل کرد کە هەوەجە کەێد چەودێری مناڵەیلیان بکەن کە گیچەڵ گەشە دیرن.
خەسەخانەگە داوا لەو داڵگ و باوگەیلە کەێد کە مناڵەیلیان وەلایەن لیژنەی گەشە توومارکریانە سەردان دامەزریاگەیل پزشکی بکەن ئەرا تەواوکردن دانشتنەیل وشکنین و چارەسەر.
خەسەخانەگە لە بەیاننامەیگ رەسیە ئاژانس شەفەق نیوز دووپاتکرد،ئەو مناڵەیلە وەدەس دیرکەفتن گەشەوە ناڵن هەوەجە وە وەدویاچگن پزشکی وەردەوام کەن، پشتگووش خستنی هاتێ گیچەڵ مەترسیداریگ دروس بکەێد.
ئاشکرایکرد، شمارەگ مناڵ تویشبوی وە گیچەڵ گەشە لە خەسەخانەگە چارەسەرکریانە، یەیش دیاریکەێد ئەرا گرنگی وشکنین پیشوەختە و چارەسەرکردن دەسوەجی.
دیاریکرد، گیچەڵ گەشە وە یەکیگ لە گیچەڵە تەندروسیەسل دانرێد کە هەوەجە کەێد گشت شەش مانگ جاریگ وشکنین بکرێد، دیر سەردانکردن دکتۆر بوودە هووکار وسیان گەشە یا تێکچگن تەندروسی مناڵەگە.