شەفەق نیوز - هەولێر

سەرۆکایەتی ئەنجومەن وەزیرەیل هەرێم کوردستان، ئمڕوو یەکشەممە، وەپەی کتاو فەرمی شمارە (11474) لە رێکەفت (13-09-2026)، هەر سێ وەزارەت داد و دارایی و ئابووری و پلانداین ئەرکدار کرد ئەرا وەدۊایچگن و ئامادەکردن نووڕین و رایەیل یاسایی و دەستووری لەباوەت پرۆژەیل یاسای فیدراڵی تایبەت وە قەرزەیل و بەخشینەیل و دەسمیەتییەیل (یاسای قەرزکردن و بەخشینەیل و دەسمیەتییەیل).

 ئامانج لەی رێکارە، وەپەی بەیاننامەیگ کە رەسیە ئاژانس شەفەق نیوز، مسۆگەرکردن مافەیل و شایستە داراییەیل هەرێم کوردستانە، هەمیش بڕیارەگە دووپات لەبان جیوەجیکردن مادەی (106) لە دەستوور کرد، کە دەق خەێدە بان هەوەجەی دایین بەش شایستەی هەرێم کوردستان لە هەر قەرزیگ یا دەسمیەتییگ ناودەوڵەتی کە حکومەت فیدراڵی وەدەسی تیەرێد.

 بەیاننامەگە دیاری کرد، کە هەرێم کوردستان بەشداری کردیە لە گلەوداین قەرزە ناودەوڵەتییەیل و سوودەیلیان، و لەوەر ئەوە هەوەجە کەێد، لە وەخت بەشەوکردن قەرزەیل و بەخشینەیل، مافە دەستوورییەیل هەرێم وەپەی ئەوەگ دەستوور دەق لەبانی دایە جیوەجی بکریەێد.

 لە کووتایی، بەیاننامەگە دووپات کرد، لەبان ئەوەگ پرۆژەی ئی یاسایەیلە کاریگەرییگ راسەوخۆ لەبان مافە دەستووری و داراییەیل هەرێم دیرن، و لەوەر ئەوە هەوەجە کەێد رەچەوکردن بنەمایەیل سیستەم فیدراڵی و دادپەروەری بکریەێد لە گشت قۆناغەیل گفتوگۆکردن و چەسپاننیان.