شەفەق نیوز/ حکومەت هەرێم کوردستان، ئمڕوو شەممە، مەزەنە کرد شمارەی گەشتیارەیل ک هاتنەسە هەرێم کوردستان بڕەسێدە زیاتر لە ٦ مەلیۆن کەس تا کۆتایی ساڵ ٢٠٢٢.
فەرمانگەی راگەیانن و زانیاری لە حکومەت هەرێم کوردستان لە بەیاننامەیگ وت: یەکیگ لە ئامانجەیل ئەنجومەن وەزیرەیل وەردەوامی لە گەشەپێدان و گورجکردن کەرت گەشتوگوزاریە لە هەرێم کوردستان، ئەراوە یاسای گەشتوگوزاری لەی حکومەتە واژوو کریا، ک لەوەر نەوین یاسیگ تایبەت وەخوەی کەرت گەشتوگوزاری گرفتەیل فرەیگ داشت.
وەگورەی ئامارەیل دەسەی گەشتوگوزاری کوردستان، ئیرنگە ٤٦٠ هوتێل و ٢٨٢ موتێل و ١٠ شار بازی و ٦٠٠ کۆمپانیا و نویسینگەی گەشتوگوزاری و ٤٥ یانەی شەوانە و ٧٢ هۆڵ ئاهەنگ لە هەرێم کوردستان هەس ک خزمەت هاووڵاتیەیل و گەشتیارەیل کەن.
وەگورەی ئامار دەسەی گەشتوگوزاری، نزیکەی ٤ مەلیۆن گەشتیار لە یەکەم شەش مانگ لەی ساڵە سەردان هەرێم کوردستان کردنە، و مەزەنە کریاگە تا کۆتایی ئی ساڵە زیاتر لە ٦ مەلیۆن گەشتیار سەردان هەرێم کوردستان بکەن.