شەفەق نیوز/ سەفین دزەیی وەرپرس پەیوەندیەیل دەیشتەکی لە حکومەت هەرێم کوردستان، ئمڕوو سێشەممە، ئەوەگ لەباوەت نیاز داگیرکردن زەویەیل هەرێم کوردستان وەلایەن ئیران باسی کریەێد، وەئامانج جیوەجیکردن ئۆپراسیۆنیگ سەربازی هشکایی لەبان حزبەیل کورد ئۆپۆزسیۆن رژیم ئیرانی رەت کرد.
دزەیی لە قسەیلی ئەرا رووژنامەوانی دویای سەردان وەزیر وەرگری هۆڵەندا، وت: خانمە وەزیر وەرگری هۆڵەندا سەردان فەرمانگەی پەیوەندیەیل دەیشتەکی کرد، و پیشوازی لەلی کردیمن، و باس رەوشەیل سیاسی و رەوش هەرێم کوردستان لە ئابووری و سەختیەیل نوای هەرێم کوردستان کریا.
وتیش: خانمە وەزیر وت: هەرێم کوردستان کاریگەری سەرەکیە لە بتەوکردن ئارامی لە ناوچەگە، وتیش: ئیمە تەقەلا دەێمن ئی گرفتەیلە لەناو بیریەێد، و هەرێم کوردستان لە هویچ وەختیگ شوێنی رخبەر لەبان ئاسایش نەتەوەیی دەوڵەتەیل هاوسا نەویە.
دزەیی وتیش: داوا کردیمن تەقەلا بیریەێد تا هەرێم کوردستان و گەل عراق وەگشتی دویر لە ژاوەژاو بوود، و بایەتە دەوڵەتەیل هاوسا ڕێز لە سەروەری وڵاتەگە بگرن.
هەمیش وت: ئیران دەوڵەتیگ گرنگە، و لە وەختیگ گوزەشتە دەرەیلی ئەرا پەنابەرەیل لە هەرێم کوردستان واز کردیە، و پەیوەندی قویلیگ وەردی دیریمن، و دیاری کرد ک ئەوەگ لەلایەن بەشیگ لە لایەنەیل فەرمی ئیرانی باسی کریەێد هویچ بنەمایگ لە راسی نەیرێد.
هەمیش وت: هەرێم کوردستان تەقەلا دەێد بوودە کاریگەر ئارامی، و هەرێم کوردستان ری نیەێد تا بوودە شوینیگ ئەرا دوژمنی و شیوانن ئاسایش و ئارامی دەوڵەتەیل هاوسا چ ئیران یا تورکیا، و تەقەلا دەیمن وە گفتوگۆکرد چارەی ئی گرفتەیلە بکەیمن، و داوا لە دەوڵەتەیل خوەرئاوایی کرد پاڵپشتی ئارامی هەرێم کوردستان و گشت عراق بیەن.