شه‌فه‌ق نيوز/ ئمڕوو دانيشتن ليژنه‌ى وه‌رگرى له ماف ژنه‌يل له په‌رله‌مان كوردستان وه سه‌رپه‌رشتى هێمن هه‌ورامى جيگر سه‌رۆك په‌رله‌مان و وه‌ئاماده‌بوين مونا قاوه‌چى سكرتێر په‌رله‌مان و له‌نجه ئبراهيم سه‌رۆك ليژنه‌ى وه‌رگرى له ماف ژنه‌يل و جيگره‌گه‌ى و شماره‌يگ تر له ئه‌ندامه‌يل په‌رله‌مان و راوێژكاره‌يل و نوێنه‌ر ليژنه‌ى ياسايى وه ئامانج په‌سه‌نكردن ده‌س له‌كاركيشانه‌وه‌ى جيگر سه‌رۆك ليژنه‌گه له پۆسته‌گه‌ى و هه‌ڵوژانن ئه‌نداميگ تر وه‌ڕيه‌وچێ.
له‌و دانيشتنه ئاشنا عه‌بدوڵڵا ده‌س له‌كاركيشانه‌وه‌ى خوه‌ى له پۆست جيگر سه‌رۆك ليژنه‌ى وه‌رگرى له ماف ژنه‌يل پيشكه‌ش كرد و دوياى ده‌نگداين په‌سه‌ن كريا و دوياخريش هێمن هه‌ورامى قاپى كانديدكردن واز كرد و شادى نه‌وزاد ئه‌را ئه‌و پۆسته خوه‌ى كانديد كرد و ته‌نيا كانديديگ بوى و هه‌ڵوژريا ئه‌را شوونگره‌وه‌ى عه‌بدوڵڵا.
جى باسه، ته‌وه‌ر دويه‌م له دانيشتنه‌گه، له‌تى باس له ئه‌نجامداين زنجيره دانيشتنه‌يليگ وه‌ل وه‌زاره‌ته‌يل حكومه‌ت هه‌رێم كوردستان كريا له سه‌ره‌تاى هه‌فته‌ى ئاينده.