شەفەق نيوز/ قەیران ئاو لە پارێزگای ئیلام فەیلی لە ئیران تیژیی زیاترەو بوود، کە محمد محمدی سەرۆک جیوەجیکار کۆمپانیای ئاو و ئاوەڕۆی لە پارێزگاگە وت: وشکەساڵیە سەختەگە کاریگەری کارەساتی لە بان خەڵک ئاوایەیل داشت، کە رەسیە قەیران بەرزیگ لە رەسین ئەرا ئاو نووشین پاک.

محمدی لە قسەیلی ئەرا میدیایەیل ئیرانی وت: کەمی ئاو نووشین بیوەی رخداری بڵاوبوین ئەو بیماریەیلە زیای کەێد کە پەیوەندی وە پیسبوین ئاو دیرن، و وەشیوەیگ تایبەت هەڕەشەی تەندروسی مناڵ و پیر و بیمارەیل دەێد، هوشداری دا کە وەردەوامی رەوشەگە وەیجویرە هاتێ بیلێد زیاتر لە خەڵک ئاوایەیل بار بکەن.

   وتیش: 577 ئاوای لە پارێزگای ئیلام تویش سەختی راسگانی لە وەدەسهاوردن ئاو هاتنە.

محمدی دیاری کرد کە دەسەڵاتەیل ناوخوەیی یاداشت لەیەکفامستن وەرد لایەنەیل پیشکەشکەر واژوو کردنە ئەرا دابینکردن ئاو نووشین وەردەوام ئەرا 100 ئاوای بیبەش، کە پلانەگە دروسکردن زیاتر لە 600 کیلۆمەتر لە کڕ کلکردن و تووڕەیل بەشەوکردن ئاو گرێدەو.

 هەرلیوا، باس وەکارخستن پڕۆژەی کلکردن ئاو ئەر 40 ئاوای لەی ساڵە کرد، وەهاوکاری ریخریاییگ خێرخواز نیشتمانی، دووپات کرد کە پرۆژەگە ئاو وەردەوام ئەرا زیاتر لە 5521 لە خەڵک ئاوایەیل دابین کەێد.

راپۆرتەگە دووپاتیش کەێد کە پارێزگای ئیلام کە کەفێدە ناو کەشوهەوای گەرم و وشک، یە چەن ساڵیگە زیان کەمی واران و داوەزیان ئاست ئاو ژیرزەوی دیرێد، بیجگە شەپوول گەرمی بەرز، کە بویە مدوو داوەزیان بەرهەم کشتوکاڵی و ئاژەڵی لە ئاوایەیل، و زیایبوین زیان لە وەدەسکەفتن ئاو، هیشت بەشیگ لە خیزانەیل ئاوایەیلیان بیلنەجی وە مینەی ژیانیگ خاستر.