شەفەق نیوز/ جاریگتر قەیران مووچەی خانەنشینیەیل لە سلێمانی هاتەدەر، ک خانەنشینیەیل وە خەرجنەکردن مووچەیلیان سەرسام بوی، ک بڕیار بوی ئمڕوو یەکشەممە خەرج بکریەێد.

وەگورەی لیست وەزارەت دارایی و ئابووری لە حکومەت هەرێم کوردستان، بڕیارە ئمڕوو مووچەی خانەنشینیەیل مەدەنی وشمارەیگ لە وەزارەتەیل بەشەو بکریەێد.

یەکیگ لە خانەنشینیەیل ک نەخوازێد ناوی ئاشکرا بوود، ئەرا ئاژانس شەفەق نیوز وت: فرە لە خانەنشینیەیل لە ساعەت سێەی شەوەکی هاتنەسە بانکەیل سلێمانی، باوجی وەپیان وتیا مووچە نییە، هەرچەن پویلیش لە بانک هەس، وەلێ فەرمان خەرجکردنی نەهاتیە.

خاڵو ئەحمەد، خانەنشین پیریگە، وت: بڕیار بوی ئمڕوو مووچەی مانگ تەمووز بەشەو بکریەێد، وەلی لەوەر هووکارەیلیگ نادیار ئەوە نەوی، و ئەرا زانیاری فرە لەلیمان هاتیە و خوەییش بیمارە ولەی گەرمیە، وبەشیگمان پویل کرای ماشین نەیرێد تا گلەو بخوەێد.

خاڵو ئەحمەد پرسیار لە هووکارەیل قەیران مووچە کرد ئایا ئیداریە یا داراییە؟، و پرسیاریش کرد ئەرا لە هەولێر و دهۆک بەشەو کریا، ولە سلێمانی نیەکفێدە ری.

خاڵو ئەحمەد داوا لە حکومەت کرد ریز لە ریش چەرمگ خانەنشینیەیل بگرن وبنووڕنە قوربانیداینیان لە ساڵەیل خزمەتیان، و چە لەو ماوەیل گوزەشتە پیشکەش کردنە.

سەرچەوەیگ ئاگادار لە بانک مەلکندی ئەرا ئاژانس شەفەق نیوز وت: دیرکەفتن خەرج مووچەگە لەوەر ئاڵشتکردن خشتەی بەشەوکردنەگە بویە لەوەر پشوو مانگ موحەڕەم.