شەفەق نیوز/ سەرچەوەیگ ئەمنی لە پارێزگای دهۆک لە هەرێم کوردستان، ئمڕوو دووشەممە، خەوەردا ک تووپەیل تورکیا تووپواران ئاوایەیلیگ سنووری لە ناحیەی باتیفا لە باکوور پارێزگاگە کردن.
سەرچەوەگە ئەرا ئاژانس شەفەق نیوز وت: ئاوایەیل بیریلا و مەنبێ و ئەفەلهو و بانک و شیلان و نزور و کەشان لە ناحیەی باتیفا لە پارێزگای دهۆک کەفتنە وەر تووپواران وەردەوامیگ، و دیاری کرد ک تووپوارانەگە دژوە پەکەکە بوی.
سەرچەوەگە دیاری کرد ک تا ئیسە بڕ زەرەدەیل ئەو ئاوایەیلە نەزانریاگە، وتیش؛ لە وەخت دەسکرن ئۆپراسیۆن سەربازی تورکیا ئەو ئاوایەیلە چووڵن، بیجگە ئاوای بان.
لەلای خوەیانیش، وەچەودیەلیگ ئەرا ئاژانس شەفەق نیوز وتن: دەنگ رممەی تووپەیلە لە ناوڕاس ناحیەی باتیفا ژنەفیەن.