شەفەق نیوز - هەولێر

شار هەولێر پایتەخت هەرێم کوردستان شەویگ سەخت وەخوەی دی وە هووکار شەپۆل واران فرەیگ و تافاوەیل تونیگ کە دادە ناو چەن گەڕەکیگ نیشتەجببۊن، وە تایبەت ناوچەیل خوەرهەڵات کە لە جادەی 150 مەترییەو دریژەو بوود وەرەو هەولێر نوو و سێبەردان.

 لافاوەیل بۊنە هووکار گیان لەدەسداین گەنجیگ وە ناو محمد رەسوڵ (28 ساڵ) و مناڵیگ وە ناو مستەفا سەرکەوت (5 ساڵ) وە خنکیان، لە شان رەسانن زیانەیل ماددی فراوانیگ وە سەدان ماڵ و ماشین و دوکانەیل بازرگانی.

 لە وەختیگ دەسەڵاتەیل پەکخستن دەوام فەرمی لە دامەزراوەیل پەروەردەیی و ئامادەبۊن تیمەیل وەرگری شارستانی راگەیانن، ناڵین مەیدانی ئەرا دانیشتگەیل فرەترەو بۊ کە خەوەرەو بۊن لەبان مەزەنەی زیانەیل و بردن ماڵ و سامانەیلیان.

وەچەودیەیل زینگ

لە گەڕەک "سێبەردان"، هاووڵاتی ئەحمەد ئەرا ئاژانس شەفەق نیوز قسە کرد و وت، کە وارین واران رفتیگ دەس وەپی کرد کە ئیمە لە ماوەیگ فرە کوڵ وەی جۊرە نەۊمن.. لە ماوەی کەمتر لە نیم ساعەت، تافاوە خەڕگینەیل لە جادە سەرەکییەیلەو هاتنە و ناو حەوش و ناوماڵەگە.

 ئەحمەد زیای کرد، کە ئاست ئاوەیل بەرزەو بۊ تا بڕەسێدە فرەتر لە مەتریگ لەناوی کەلوپەل و ئامێرە کارەباییەیل.. و هیچ دەرفەتیگ نەیاشتیمن ئەرا دەرهاوردن چشتیگ، و زیانەیل لە کەلوپەل ناوماڵ و دیوارەیل وە تەواوی بۊ.

 لە گەڕەک "هەولێر نوو"، هاووڵاتی سۆران بارزان ئویشێد کە چۊن جادەگە ئاڵشت بۊە ئەرا رێڕەو جوو تونیگ: "گشت ریەیل لە شارەگە بەسیاگ بۊن و فرەیگ لە مەردم گیر خواردن و نەتۊنستن گلەو بخوەن ئەرا ماڵەیلیان".

 زیانەیل لە کەرت ماشینەیل کەمتر سەخت نەۊن؛ چۊنکە تافاوەیل دەیان ماشین بردن و بۊنە هووکار لەیەکەودانیان وەرد یەکتر و خڕەوبۊنیان لە نزیک بلۆکە چیمەنتۆییەیل و رێڕەوەیل ئاو.

رانندەی تەکسی ئاراس مەجید، ئەرا ئاژانس شەفەق نیوز ئۊشێد: "تەقەلا دام بڕەسمە ماڵ وەرجە ئەوەگ رەوشەگە خراوترەو بوود، وەلێ لافاوەگە لەڕی لەناکاو دەورەمان دا.. ئاوەگە ماشینەگە بەرزەو کرد هەرجۊر پارچە چوویگ، و دا لە ماشینیگ ترەک کە وسیاگ بۊ".

لە قسەیلی دریژە دا و وت: "ناچار بۊم لە پەنجەرەگەو دەرچم و گیان خوەم رزگار بکەم.. وەلێ ماشینەگە تاکە سەرچەوەی ژیانمە، و بزوێنەرەگە و پارچە ئەلکترۆنییەیل وە تەواوی لەناو چگنە".

 هەمیش هاووڵاتی سەردار ئەمین خاوەن ماشین تایبەت ئەرا ئاژانسەگە ئاشکرا کرد، کە ماشینەگە لەوەردەم ماڵەگە پارک کریاۊد، و لە تونی تافی ئاوەگە بردیەسەی ئەرا دویرییگ فرەتر لە 200 مەتر تا کەفتەسە کەنار ری کۆرنیش.. پەیکەرەگەی وە تەواوی زیان وەپی رەسیە دۊای خشاینی وە چشتەیل و ماشینەیل ترەک.. زیانەگە گەورە و لەناکاوە".

 وارین وارانە رفتەگە کە نزیکەی 80 ملم بۊ لە ماوەیگ کوڵ، بۊە مدوو رەدکردن توانای هەڵگردن ئەرا تووڕەیل ئاوەڕۆ.

 یەیش لە وەختیگ تیمەیل خزمەتگوزاری و شارەوانییەیل و کۆمەڵەیل وەرگری شارستانی وەردەوامن لە وازکردن ریە بەسیاگەیل و کیشانن ئاوەیل لە گەڕەکە زیانلیکەفتگەیل و جادەیل شارەگە، لە ناوڕاس خوازینەیل جەماوەری فراوان وە قەرەبووکردن زیانلیکەفتگەیل و پەیاکردن چارەسەرەیل بنەڕەتی ئەرا ریگری لە دووپاتەوبۊن رەوانەبۊن لافاوەیل وەرەو ناوچە نیشتەجیبۊنەیل.