شەفەق نیوز- دیمەشق
ئەندام ئەنجومەن گەل سووری و ئەندام تیم سەرۆکایەتی راسپاریاگ وە تێکەڵکردن هازەیل سووریای دیموکرات "هەسەدە"، مستەفا عەبدی، ئمڕوو یەکشەممە، خەوەردا کە دۆسیەی گلەوخواردن کوچپیکریاگەیل ئەرا ناوچە بنەڕەتییەیلیان لە باکوور خوەرهەڵات وڵاتەگە هێمان وەردەوامە، هاوەخت وەگەرد پیشکەفتن رێڕەو تیکەڵکردن دامەزراوەیل و هازەیل سەر وە "وەڕێوەبەرایەتی خوەیی" لەناو دامەزراوەیل دەوڵەت سووری.
عەبدی ئەرا ئاژانس شەفەق نیوز وت کە تیمەیل لاوردن مینەیل وەردەوامن لە کارەیلیان لە ناوچەیل دەیشتایی رەئسولعەین، وە ئامانج پاکەوکردن ریەیل و زەۊیە کشاوەرزییەیل لە مینەیل و جیماگە چنیاگەیل لەماوەی ساڵەیل گوزەشتە، و دیاری کرد کە یە نوێنەرایەتی یەکیگ لە دیارترین دۆسیە گریەدریاگەیل وە گلەوخواردن کوچپیکریاگەیل کەێد.
دیاری کرد کە کارەیل لاوردن مینەیل ئەو ناوچەیلە گرێدەو کە مینەیل لەناویانیان چنیانە لە لایەنەیل جیاجیا لەماوەی ساڵەیل جەنگ، و دووپات کرد کە کارەگە هێمان وەردەوامە وە ئامادەکاری ئەرا تەواوکردن گلەوخواردن خەڵکەگە ئەرا ناوچەیەیلیان.
لەباوەت رێڕەو تیکەڵبۊن لەناوەین دیمەشق و "هەسەدە"، عەبدی وت کە پرۆسەگە "چگەسە ناو گامە کوتاییەیل"، و دیاری کرد کە گرووپیگ لە دادوەرەیل کارکەر لە دامەزراوەیل وەڕێوەبەرایەتی خوەیی کوتایی وەو چەوپیکەفتنەیل هاوردنە کە وەزارەت داد سووری وەگەردیان ئەنجامی داگە.
وتیش کە دەرچگن ئەنجام چاوپیکەفتنەیل ری واز کەێد لەوەرانوەر وازکردن کۆشک دادی لە هەردوگ شار حەسەکە و قامیشلۆ، و دۊنێد کە تەواوکردن ئی دۆسیە وە واتای تەواوکردن یەکیگ لە دیارترین بازنەیل تیکەڵبۊن دامەزراوەیی لە ناوچەگە تیەێد.
لەباوەت مەوقەی چەوەڕیکریاگ ئەرا هەڵوەشانن "هەسەدە" و یەکینەیل پاراستن گەل، عەبدی وت کە یە شایەت زۊوەزۊ جیوەجی بوود، و وەرجە کوتایی ئی مانگە.
لەباوەت شمارەی گلەوخواردگەیل، ئەندام ئەنجومەن گەل ئاشکرای کرد کە نزیکەی 13 هەزار خیزان گلەوخواردنە ئەرا ناوچە بنەڕەتییەیلیان لە عەفرین و رەئسولعەین و عەینولعەرەب (کۆبانێ)، لە چوارچیوەی پرۆسەیل گلەوخواردن کە لەماوەی گوزەشتە دەسوەپی کردنە.
گلەوخواردن کوچپیکریاگەیل عەفرین رێکخستن چەن کاروانیگ وەخوەیەو دۊنی، وەگەرد راگەیاننیگ وەرین لەباوەت گلەوخواردن هەزاران خیزان ئەرا ناوچەگە، لە وەختیگ گلەوخواردن کوچپیکریاگەیل رەئسولعەین هێمان تویش سەختیەیل گریەدریاگ وە ماڵەیل و ژیرخان و لاوردن مینەیل بوودەو.
دۆسیەی گلەوخواردن کوچپیکریاگەیل وە یەکیگ لە دیارترین دۆسیەیل گریەدریاگ وە رێڕەو یەکلاکردنە لەناوەین دیمەشق و "هەسەدە" هەژمار کریەێد، کە تەواوکردنی هەوەجە وە چارەسەرکردن دۆسیەیل مینەیل و موڵکەیل و خزمەتگوزارییەیل و ئاسایش دیرێد، لەشان زامنکردن گلەوخواردن دانیشتگەیل وە شیوەیگ ئارەزوومەندانە و ئارام ئەرا ناوچە بنەڕەتییەیلیان.
گلەوخواردن زیاتر لە 400 خیزان ئەرا رەئسولعەین، دووشەممەی گوزەشتە، ناکۆکییەیلیگ لەبان ماڵەیل لەناوەین گلەوخواردگەیل و دانیشتگەیلیان وەخوەی دی، دۊای رەسین خیزانەیل ئەرا ناو ماڵەیلیان وەبی هەماهەنگی وەرین.
ناکۆکییەیل پەرە سەنن ئەرا وەردەوەردە و خوەینشاندانەیل کە دریژەو بۊن ئەرا حەسەکە و قامیشلۆ و عاموودا و دەرباسیە و تەل تەمر و مەعبدە، تا رەسین وە عەینولعەرەب (کۆبانێ)، کە بارەگایەیل ئاسایش ناوخۆیی وەرەوڕۊ پەلامارەیل بۊنەو و پەرچەم سووریا لە بڕیگیان داگیریا.