شەفەق نیوز/ وەڕێۆبەرایەتی تەندروسی لە قەزای چەمچەماڵ سەرەوە پارێزگای سلێمانی، ئمڕوو پەنجشەممە، وت: ئەو شافەیلە ک دەربارەی پیاویگ بڵاو کریان، ک گوایە ئەنجام تاقیکردنەوە پزشکیەگانی دەرچگە ک خوەی دووگیانە، هیچ راس نییە.

وەڕێۆبەرایەتیەگە بەیاننامەیگ ئمڕوو وت: تاقیکردنەوەی پزشکی هەڵەیگ بڵاو کریاگە، ک ئووشێد گوایە پیاویگ ٦٠ ساڵان زگی پڕ بویە و دووگیانیە، و دووپات کرد ک ئی خەوەرە هیچ بنەمایگ لە راسی نەیرێد.

و ئاماژە کرد ک ئەو لایەنە ک ئی خەوەرە بڵاو کرد، دویرە لە رسوومەیل و پێشەی رۆژنامەوانی وکار راگەیانن، چوونکە ناو خەسەخانەگە و وێنەی تاقیکردنەوەگە بڵاو نەکردگە، و ئەوە بەڵگەیگە ک خەوەرگە راس نییە.