سەرچەوەگە ئەرا ئاژانس شەفەق نیوز وت؛ نزیک ساعەت یەک نیمەڕو، ماشینیگ لەبان ری ناوەین ناحیەی تەکیە و قەزای چەمچەماڵ نزیک یەکیگ لە تاسەیل سەرەکی، کەسیگ لەناوی دەرچگ و لەشی ئاگر گردوێد.

وتیش؛ دەزگایل ئەمنی رەسینە شوین رویداوەگە ئەرا رەسین وە بندروس ئەو نەقیانە لە وەختیگ باس ئاماجکردن ئەو ماشینە وە فڕۆکەیگ دەڕۆن کریەێد.

لەلای خوەییش؛ رەمەک رەمەزان قایمقام چەمچەماڵ ئەرا پەیامنێر ئاژانس شەفەق نیوز وت: هوکارەیل رویداوەگە تا ئیسە نەزانیایە، باوجی وەگورەی زانیاریەیلمان، ماشینەگە وە سیستەم گاز کار کەێد، و هاتێ لەوەر گیچەڵیگ میکانیکی تەقیەسەو، وتیش؛ هیزەیل ئەمنی خوەیان بڕیار هوکارەیل تەقیانەگە دیاری کەن.

مەمەند رەشید وەڕیەوبەر ناحیەی تەکیە لە قسەیلی ئەرا پەیامنێر ئاژانسمان دیاری کرد ک تا ئیسە هوکارەیل رویداوەگە دیار نییە، و چەوەڕی ئەنجامەیل لێکۆڵینەوە کەیمن، ئەرا رەسین وە بندروس رویداوەگە، وتیش؛ دوو کەس لەی تەقیانە زەخمدار بوینە.