شەفەق نیوز- سلێمانی

شار سلێمانی خوەی ئامادە کەێد ئەرا باوەشکردن ئەرا بازاڕ زمسانە لە ماوەی ناوەین 2 تا 12ی کانوون یەکەم/ دیسەمبەر ئایندە، وە بەشداری کۆمپانیایل ناوخوەیی و براندەیل بازرگانی جیاجیا، لەناو وادەیل دابینکردن بەرهەمەیل وە نرخ گونجیاگ ئەرا هاووڵاتییەیل، و تەرخانکردن خەڵاتەیل رووژانە و تیروپشک لەبان ماشین، لە چالاکییگ  بازاڕکردن و خوەشگوزەرانی و چالاکییەیل رووشنهویری کووی کەێدەو.

حەسەن حەمید، وەڕێوەبەر پێشانگای ناودەوڵەتی سلێمانی، لە کۆنگرەیگ رووژنامەوانی کە ئاژانس شەفەق نیوز ئامادەی بوی وت: بازاڕ زمسانە وە دەسمیەتی وەگەرد کۆمپانیای "ئەتڵەس" و وە سەرپەرشتی ژوور بازرگانی و پیشەسازی سلێمانی وەڕیەو چوود، وە ئامانج پاڵپشتیکردن کۆمپانیایل ناوخوەیی و رەخسانن دەرفەت لە وەردەم هاووڵاتییەیل ئەرا وەدەسهاوردن هەوەجەیلیان راستەوخوەی و وە نرخ رکابەری.

حەمید ئاشکرا  کرد کە بازاڕەگە 10 رووژ وەردەوام بوود، و گشت بەرهەم و کاڵایەیل جیاجیا گرێدەو، لە ماددەیل خوەراکی و پاکەوکەر و پووشەن تا کاڵایەیل وەکاربردن ترەک، و دیاری کرد بەشداریکردن وازە لە وەردەم کۆمپانیایل و خاوەن پڕۆژەیل بویچگ و پیشەوەرەیل و فرووشیارەیل وە گشت پسپۆڕییەیلیانەو.

وتیش؛ وەڕێوەبەرایەتی پێشانگاگە ئاسانکاری و نرخەیل گونجیاگ دابین کردگە ئەرا کۆمپانیایل بەشداربوی، وەرانوەر ئەو خزمەتگوزاری و ئامادەکارییەیلە کە رێکخستن چالاکییەگە هەوەجیان کەێد، جویر کارەبا و گەرمکەرەیل و خزمەتگوزارییە لۆجستییەیل، بیجگە سازکردن چالاکییەیل هونەری و رووشنهویری و خوەشگوزەرانی وەگەرد ساڵیاد دامەزرانن شار سلێمانی.

باس لەوەیش کرد بازارەگە بەشەوکردن خەڵاتەیل رووژانە وەخوەی دۊنێد وە دەسمیەتی وەگەرد کۆمپانیایل بەشداربوی و وەڕێوەبەرایەتی پێشانگاگە، بیجگە تەرخانکردن ماشینیگ لە ناو خەڵاتەیل، و دووپات کرد  ئی گامە ئەرا بتەوکردن سەرنجڕاکێشی چالاکییەگە و گاڵداین هاووڵاتییەیل تێد ئەرا سەردانکردن پێشانگاگە.

لە چوارچمگ ئاسانکاری رەسین سەردانکەرەیل، حەمید ئاشکرایکرد هەماهەنگی  وەگەرد گەراج تاسڵووجە جگەکردیە ئەرا دابینکردن 45 پاس کە ریکلامەیل بازارەگە هەڵگرن و هاووڵاتییەیل ئەرا پێشانگاگە گوازنەو، و دیاری کرد  کرای رەسانن 750 دینارە.

وەڕێوەبەر پێشانگای ناودەوڵەتی سلێمانی داوا لە کۆمپانیایل کرد بەشداری بکەن و بەرهەمەیلیان وە نرخ پووڕیاگ پێشکەش بکەن، و دووپات کرد چالاکییەگە دەرفەتیگە ئەرا پتەوکردن ئامادەبوین کۆمپانیایل لە بازاڕ ناوخوەیی و دابینکردن هەوەجەیل هاووڵاتییەیل وە نرخ پوڕیاگ.