شه‌فه‌ق نيوز/ مه‌سعود بارزانى سه‌ركرده‌ى كورد، ئه‌رك محه‌مه‌د تۆفيق عه‌لاوى سه‌رۆك وه‌زيره‌يل راسپارياێ وه سه‌خت تاريف كرد و له هه‌مان وه‌خت داوايش له خوه‌ينيشنده‌ره‌يل كرد رێ وه ئنتهازيه‌يل نه‌يه‌ن سوار شۆپل ناڕه‌زايه‌تيه‌يل بوون.
بارازانى له ديمانيه‌گ وه‌ل "ئه‌ندبندنت" عه‌ره‌بى ك شه‌فه‌ق نيوز ئاگادارى بوى وت: له يه‌كه‌مين ئه‌وله‌ويات كاره‌يل هه‌ر حكومه‌تيگ ئه‌وه‌سه ئاسايش و خزمه‌تگوزارى ئه‌را هاووڵاتيه‌يل دابين بكا، ئه‌و ناوچه‌يل عراقيه ك خوه‌ينشانداين له‌تيان ئه‌نجام ئه‌دريه‌ێد ئى مه‌رجه‌يله ئه‌را ماوه‌ى فريه‌يگه له‌تيان نيه و هه‌ر هاووڵاتييگ له ماڵ ده‌ربچێد ئه‌گه‌ره‌يل ئه‌وه ئه‌كريه‌ێد دى نه‌يه‌ێده‌و له‌وه‌ر ئه‌وه‌گ يا بكوشيه‌ێد يا بڕفيه‌ێد و كه‌سيش نه‌زايد ته‌رمه‌گه‌ى له كوورا فڕه بدريه‌ێد، بيگومان ئى حاڵه‌تيشه نه‌بايه‌د وه‌رده‌وام بدێ، جموجويليش ماف هاووڵاتيه‌يله ئه‌را داواكارى مافه‌يليان و ئيمه‌يش لايه‌نگرى داواكاريه‌يليان ئه‌كه‌يم، وه‌لێ تێبينييگ داشتيم ك ئه‌ويش ئه‌وه‌سه رێ وه ئنتهازيه‌يل نه‌دريه‌ێد له‌وانه‌گ وه‌رپرسن له گه‌نده‌ڵى سوار شه‌پۆل ناڕه‌زايه‌تيه‌يل بوون.
بارزانى له‌باره‌ى سه‌رۆك وه‌زيره‌يل راسپارياى وت: محه‌مه‌د عه‌لاوى پياويگ وه حورمه‌ته‌و له خيزانيگ خاس و ناودار به‌غداس، وه‌لێ ئه‌ركه‌گه‌ى وه سه‌خت تاريف كرد و نه ئه‌و و نه‌يش كه‌س تر بيجگه ئه‌و سه‌ركه‌فێد له‌ساى وجوود جه‌ماعه‌ت چه‌كدار و ده‌رچگ له ياسا و ناڕيگ و ناپه‌يوه‌س وه فه‌رمانه‌يل ده‌وڵه‌ت.