شەفەق نیوز/ مەسرور بارزانی سەرۆک حکومەت کوردستان، ئمڕوو شەممە، بانگواز ئەرا هێز و لایەنە سیاسیەگان لە هەرێم کرد، ئەرا یەکێتی ریزەگان، ئەرا وەپشتسەرنان قیرانەگان ک هەرێم کوردستان لەلیان زیان وەخوەی دوینێد.
ئەویش لە پەیام پێروزبایی هات وەبۆنی ساڵیاد ٧٤ ئەرا دامەزرانن پارت دیموکڕات کوردستان و لەداڵگبوین سەرکردەی کورد مەسعود بارزانی.
مەسرور بارزانی لە پەیامەگە وت: دامەزرانن پارت دیموکڕات کوردستان ئاڵشتبوینیگ بوی لە مێژوو بزوتنەوەی گەلەگەمان، ک گشت ئازادیخوازەگان کەفتنە شوون سەرۆکایەتی بارزانی نەمر باوگ گیانی نەتەوگەمان ک گیان وەرخودان و وەرگری لە گشت هاووڵاتیەگان زنیەو کرد.
وتیش؛ لە ماوەی ئەو مێژوو دریژە ک پڕ لە وەرخودانی ستەم بوی و جەنگ مقەیەتی شناسنامەی نەتەوەیی ئەرا گەلەگەمان، پارت دیموکڕات ئەفسانەیلیگ دروسکرد و توێنست فرە دەسکەفت قانجاز بکەێد، و بویە قڵای پوڵایی ئەرا گشت گەل کوردستان و لەگشت بەشەگان و گشت ئازادەیل لە دریژایی ناوچەی خوەرهەڵات ناوڕاس.
بارزانی هەمیش وت: پارت دیموکڕات کوردستان و بارزانی بوینە سومبولیگ ئەرا وەرگری لە مافەیل گەل کوردستان، ئەراوە گشت پلانەیل دوژمنەگان لەدەور پارت دیموکڕات کوردستان کریەێد، وئەوە گشتی هیچ ئاڵشت نەکرد و پارتی سەرنەچەمان، بەڵکم هیشت گیان کوردستانی بوودە راسییگ لەبان نەقشەی سیاسی ناودەوڵەتی.
وتیش؛ بارزانی سەرکردەی کورد وسەرۆک حزبەگە جوور سەرۆکیگ نیشتمانی چ لە سەنگەرەیل جەنگ دژوە دوژمنەیل و تیرۆرستەیل یا لە ئاست دوبلۆماسی، خوازین گەل کوردستان نشاندا وپشتگیری کەلتور خوەشبوین کرد و بڕوایی گەلەگە لە مافەیل یاسایی خوەی زیایەوکرد.
هەمیش وت: ئمڕوو ئی ساڵیادە نووەو کەیمن، لە وەختیگ قەیران تەندروسی و ئابووری هەرێمەگە و ناوچەگە گردیەسەو، و خاسترین ریەگان ئەرا وەپشتسەرنان ئی قەیرانە خوەی یەکێتی ریزەگەمانە لە ناوخۆەوە، و لە گشت لایەنەگان ئومید خوازم رەنجەیلمان گردەو بکەێمن تا سەربکەفیمن لە بان گشت ناکۆکیەیلمان، و چارەسەر گرفتەیل ناوچەگە لە ری گفتوگۆ و ریە ئاشتەواییەگان بکەیمن.
هەمیش وت: لەی ساڵیادە پێروزبایی لە گشت خیزان شەهیدەگان کەم و خاوەن ئەنفال کریایەگان وشەهیدەیل چەکە کیماییەگان و زیندانیە سیاسیەگان گەلەگەمان، و ئارازودیرم لەی ساڵیاد موبارەکە تەمەن دریژی ئەرا سەرۆک بارزانی، و ئومیدخوازم گشت ئامانجەیل گەلەگەمان لەژیر ئاڵاگەی بانە جی.