شەفەق نیوز/ نۆینەریگ لە پارت دیموکرات کوردستان، ئمڕوو سێشەممە، بانگواز کرد ک عراق نەخریەێدە ناو ململانەی تورکیا و پەکەکە، و باس هاوکاری تەواوەتییگ لەناوبەین حکومەت کوردستان و حکومەت فیدڕاڵی لەبان خاک هەرێم کوردستان کرد.
پەرلەمانتار شیروان دوبردانی ئەرا ئاژانس شەفەق نیوز وت: بمباران وەردەوام و پێشێلکاری پەکەکە لەبان هێزەیل پێشمەرگە و دویاترین ئەوە بوی ک یەکیگ لە پێشمەرگە شەهید بوی کەفێدە ناو کارەیل تیرۆری ک وەسەختی شەرمەزاری کەیمن.
وتیش؛ ئەوە کاریگەری لەبان ئارامی عراق و هەرێم کوردستان دیرێد، و ئیمە وەرەو هەڵبژاردن چیمن، وتیش؛ هاوکاری تەواوەتییگ لەناوبەین حکومەت فیدڕاڵی و حکومەت هەرێم کوردستان هەس ئەرا وسانن ئۆپراسیۆنەیل سەربازی تورکیا، و کارەیل تیرۆری پەکەکە.
دوبردانی دیاری کرد ک گرفت تورکیا ناوخۆییە، و جەخت کرد لە بەشداری نەکردن عراق لەی ململانە.