شەفەق نیوز/ ئمڕوو دووشەممە، نوێنەر ڤیان دەخیل، وەزارەت کوزچبەری و ئاوارەیی لە حکومەت فیدراڵی توومەتبار کرد وە "گوماکردن" ئەو پویلە کە ئەرا ئاوارەیل دیاری کریاس وەشیوەیگ "ناشەرعی".

ڤیان دەخیل لە مەوقەی وازکردن نویسینگەی نوویگ ئەرا بەشەوکردن کارت نیشتیمانی ئەرا ئاوارەیل لە پارێزگای دهۆک وت: “یەیچ ئازاری ئەو خیزانەیلە زیاتر کەێد کە لە کەمپەیل ژیەن”.

وتیش: "حکومەت فیدراڵی بودجەی گەورەیگ ئەرا وەزارەت کووچبەری دیاری کرد، بەڵام وەزارەتەگە ئی پویلە ئەرا ئەو کەسەیلە خەرج کەێد کە شایستە نین، لە وەختیگ ئاوارەیل وەبی وەرگردن هویچ قەرەبوویگ وەرچەو لە کەمپەیل دەرچن، یەیش هیلێد بانانیان نادیار بوود".

 دەخیل وتیش: "بڕ فرەیگ لە ئاوارەیل کە ئەرا ناوچە ڕەسەنەیلیان لە شنگال گلەو خوەن تەنانەت ئەو 4 ملیۆن دیناریشە وەرنەگردن کە پەیمانی وەپییان دریاس، لە وەختیگ چەک ئەو پویلە دریا وە بەشیگ لەوانەگ گلەو خواردنە وەبی ئەوەگ ئەو چەکەیلە خەرج بکریەن، یەیش چینیگ ترەک لە ئاڵووزی و سەختی خستە ملیان."

 دەخیل دووپاتیش کرد کە "ناوچەی شنگال هیمان وەدەس کەمیی فرەیگ لە خزمەتگوزارییە سەرەتاییەیل جویر ئاو، کارەبا، و چەودیاریکردن تەندروسی ناڵێد"، پرسیار ئەوە هەیە کە ئایا "چوین گاڵ ئاوارەیل بیریەێد تا ئەرا ناوچەیل خوەیان گلەو بخوەن لەوار رووشنایی ئی رەوشەیل سەختە و نەوین ژیرخان بنەڕەتی."

وتیش: "ئی مدووەیلە هیشتن گلەوخواردن ئەرا شنگال باوەتیگ پڕ لە سەختی بوود"، وتیش؛ بایەسە "حکومەت فیدراڵی وەرپرسیارێتی خوەی هەڵبگرێد وەرانوەر خاسترکردن رەوش مرۆیی ئاوارەیل ناو کەمپەیل و ئەوانەگ  ئەرا ناوچەیل خوەیان گلەو خوەن".