شەفەق نیوز/ ئیزگەی "ئەس بي ئەس" ئوسترالی لە بەڕنامەیگ وەزوان ئاشووری وت: بڕێ لە گەنجەیل ێاشووری دیرن لەو وڵاتەیل بیگانەیلە ک یە چەن ساڵیگە پەنا ئەرایان بردنە، وەرەو هەرێم کوردستان گلەو خوەن.
ئیزگەگە لە راپۆرتیگ ئاژانس شەفەق نیوز وەرگێرانی کرد وت: بڕەیلیگ لەی گەنجەیلە بڕیار وازهاوردن لە ئازادی و خوەش گوزەرانی لە خوەرئاوا تیارن، و رۊی وەرەو هەرێم کوردستان کەن، وەخاتر هاوکاریکردن ئەو ئاشووریەیلە لە خاک باپیریان.
ئیزگەگە باس خانمە ئاشوری سوزان یونان کرد ک باوگ و داڵگی لە سەرەتای هەشتایلە لە بەد رەفتاتی لە عراق واینە، و لە ئەسینا پایتەخت یونان جیگر بۊینە.
وتیش: سوزان لە یونان لەداڵگبۊیە، و ئیجا خیزانەگەی فیزای هەمیشەیی لە کەنەدا وەرگرد، و تا هەشت ساڵ لەورا جیگر بۊین.
هەمیش وت: خیزانەگەی یونان خوازێد لە شۊینیگ نزیکتر لە کەسوکارەیل بنیشێد، ئەراوە چگنە ئەمریکا تا لەورا جیگر بوون.
ئیزگەگە باس ئەوە کرد ک سوزان لەناو خیزانیگ نیشتمان پەروەری گەورە بۊی ک گەنگی و دووسی ئەرا گەل و خاک خوەی داشت.
هەنای سوزان چگە یەکەم سەردانی ئەرا خاک نیشتمانی تا لە ئاهەنگ فیستیڤاڵ میژووی ئەکیتۆ بەشدار بوود، کەفتە ئەوین خاک پاپیرەیل ئاشووریی لە هەرێم کوردستان.
ئەو فیستیڤاڵە دیدەی لەبان رەنگیترین ئەزموونەیل ژیانی واز کرد ک پەیوەندییگ وەگەرد خاکەگەی دروس بۊی، و لەو مەوقەو هەر ساڵیگ سەەدان میلکانی کەێد.
ئیزگەگە وتیش؛ سەردانکردن گەنجەیلیگ ئاشووری لە وڵاتەیل بیگانەیی ئەرا نیشتمان داڵگی، هیشت سوزان وە دەسمیەتی گەنجەیلیگ ئاشووری، ریخریاگ "گيشڕۆ" (GISHRU) دامەزرنێد.
لە چەوپیکەفتنیگ وەگەرد ئیزگە ئوسترالیەگە، سوزان باس ئەو ئەزموون خوەیە کەێد، لە وەختیگ بڕیار دا کار لە دهۆک لە هەرێم کوردستان بکەێد و لەوەا جیگر بوود، و بەشداری لە کارکردن وەرد چەن ریخریایەیل ناودەوڵەتی نا حکومەتی بکەێد تا دەسمیەتی کەمدەسەیلە بەێد، تا دووارە بتۊیەنن ئەرا نیشتمان خوەیان گلەو بخوەن.