شەفەق نیوز- کەرکوک

وەڕێوەبەرایەتی جفتکاری کەرکوک، ئمڕوو چوارشەممە، 500 هەزار پەنجەماسی لە ماسی کارپ خسە ناو ئاوەیل چەم زێی بویچگ لە ناحیەی پردێ (ئاڵتون کۆپری) لە باکوور پارێزگاگە، وە مەبەست گەشەدان وە سەروەت ماسی و بەهێزکردن سەرچەوەیل سروشتی و پشتگیریکردن ئاسایش خوەراک لە پارێزگاگە.

پرۆسەی ئازادکردنەگە وە فەرمان وەڕێوەبەر جفتکاری کەرکوک زوێر عەلی، و وە سەرپەرشتی سەرۆک بەش خزمەتگوزاری سەروەت ئاژەڵی و سەرۆک هۆبە جفتکاری پردێ، و وە ئامادەبوینی شمارەیگ لە وەرپرسەیل ناوچەگە و ئیوەتکەرەیل ماسی وەڕێوە چگ.

وەڕێوەبەر جفتکاری کەرکوک زوێر عەلی ئەرا ئاژانس شەفەق نیوز وت: "ئازادکردن ئی بڕە لە پەنجەماسیەیل کارپ لە چوارچمگ هەوڵەیل وەڕێوەبەرایەتییە ئەرا گەشەدان سەروەت ماسی و پاراستن سەرچاوەیل ئاوی و سروشتی لە پارێزگاگەس".

وتیش: "پرۆسەگە ئامانج لەلی زیایکردن ئەمار ماسییە لە ئاوەیل زێی بویچگ، و گاڵدان ئیوەتکەرەیل ماسی ئەرا ئەوزەڵدان چالاکییان، وە جویریگ کە دەور بیاشتوود لە زیایکردن بەرهەم ناوخوەیی و دابینکردن سەرچەوەی خوراکی ئەرا دانشتگەیل".

دیاری کرد، وەڕێوەبەرایەتییەگە کارکەێد ئەرا جیوەجیکردن بەرنامەیلیگ ئەرا پشتگیریکردن بەشەیل جفتکاری و ئاژەڵی و ماسی، و وەلیفەتگردن لە سەرچەوەیل سروشتی وەردەس وەجیریگ کە بەرهەم ناوخوەیی بەهێز بپوشێد و پشتگیری ئاسایش خوەراک لە کەرکوک بکەێد.