وەرجەیە، لە رووژ شەممەی گوزەشتە، فەرماندەیگ باڵای سەربازی لە سوپای پاسداران ئیران راگەیان کە عراق تەنیا دە رووژی مەنیە تا چەک لە گروپە ئۆپۆزسیۆنە ئیرانییەیل بسینێد کە هانە هەرێم کوردستان، وتیش: ئەگەر ئی کارە نەکریەێد، تەهران جاریگ ترەک ئەرا ئامانجگردن ئەو گرووپەیلە گلەو خوەێد.
حزبەگە لە بەیاننامەیگ رەسیە ئاژانس شەفەق نیوز وت: ئیران چەن جاریگ هەڕەشە کردیە، لە ری وەرپرسە سیاسی و سەربازییەگانییەو، پەلامار کەمپ پەنابەرە سیاسییە کوردەیل نیشتەجیی هەرێم کوردستان دەێد، وتیش: ئیران وەردەوامە لە ئامادەکارییەیلی ئەرا بەزانن و پێشێلکردن سنوورەیل وە پەلامار ئاوارەیل دەسوەپی کەێد.
وتیش: لە ماوەی سێ دەیەی گوزەشتە ئیران سەدان ئاوارە و چالاکەیل سیاسی کوردستان ئیران لەناو خاک هەرێم تیرۆر کردیە و بومب تەقانیەسە بان چالاکییەیل گەنج و مناڵەیل و لە ماوەی چوار ساڵ گوزەشتە چەنها پەلامار مووشەکی ئەنجام داگە، لەبان کەمپەیل پەنابەرەیل سیاسی کوردستان ئیران کە لە ئەنجامی دەیان هاوڵاتی مەدەنی و پەنابەر گیانیان لەدەس دان، و زەخمدار بوین.
هەمیش وت: ئیرنگە ئیران وە ئاشکرا رووژ و مەوقەی شەپۆل نوویگ ئەرا پەلامارەیل دیاری کەێد، داوا لە وڵاتەیل جەهان و کۆمەڵگەی ناودەوڵەتی و ریخریاگەیل نەتەوە یەکگرتگەیل و ریخریایەیل ماف مرۆڤ وەتایبەت حکومەت فیدراڵی عراق و هەرێم کوردستان کرد کە ئەو پەنابەرەیلە لەبان زەوییان ژیەن، و چەویان وەو پلانەیل سەربازی و ئەمنیە بوود کە ئیران ئامادەی کەێد.
هەرلیوا داوا لەو لایەنەیلە کرد کە ئەوپەڕی تەقەلای دیپلۆماسی خوەیان و ڕێوشوێنەیل ترەک کە لەوەر دەسە ئەرا نواگردن لە هەر جویرە پەلاماریگ ئیران لەبان ئاوارەیل ئیران لەناو خاک ناوچەگە بخەنەگەڕ.
لە بەیاننامەگەیش ئەو توومەتەیل ئیرانە رەتکردەو کە وە دەسپیچگی دەسکەێد وە پەلامارەیلی لەبان وڵاتەیل هاوسا و "تاوانە دووارەبویەیلی" دژوە پەنابەرەیل سیاسی وەکاریان تیەرێد، و دووپات لە رکداری پارت دیموکرات کوردستان ئیران لەبان سیاسەی دروس و پرەنسیپ خوەی کرد کە هاوئاهەنگە وەگەرد گشت بەها و بنەما ناودەوڵەتییەیل.