شەریف سولەیمان نوینەر لە حزبەگە ئەرا ئاژانس شەفەق نیوز وت: گفتوگۆکردن ناوەین بەغداد و هەولێر وەردەوامە، و باوەت نیشتمانکردن مووچەی فەرمانبەرەیل هەرێم کوردستان وەردەوامە وە هەماهەنگی و لەیەکفامستن دویایین ناوەین هەردوگلا وە یەکلاوەکردن فرە لە ناکۆکییەیل و باوەتەیل گیرهاتگ، و دووپات کرد کە کار وەردەوامە ئەرا وەپشتسەرنان گشت ناکۆکیەیل ناوەین هەردوگلا.
سولەیمان دیاری کرد کە نیشانەیل خێر لە دانوسەنین دویایی ناوەین بەغداد و هەولێر هەس، و وەپشتسەرنان ناکۆکیە سەختەیل هەی کە ئیسە توەنیمن وەپییان بویشیمن (ئاسان) کە ری چارەکردن وە پابەندبوین وە دەستوور و وەدەسهاوردن مافەیل وەگورەی رێککەفن سیاسی دیرێد.
دووپاتیش کرد کە چارەسەریەیل نزیکەو بوین ناوەین بەغداد و هەولێر، وەتایبەت لەسای پابەندبوین وە دەستوور و بنەمای هەماهەنگی و هاوسەنگی و هاوبەشی.
ئەو سەردانە کە نێچیروان بارزانی سەرۆک هەرێم کوردستان لە مانگ نیسان گوزەشتە ئەرا بەغداد ئەنجامی دا، گرنگی و ئافەرین حکومەتی و پەرلەمانی و کۆمەڵایەتی وەشوین خوەی هاورد، دویای ئەوە کە رەسین ئەرا رێککەفن ناوەین بەغداد و هەولێر راگەیان.
بارزانی وەگەرد رەسینی ئەرا بەغدا، لە ٢٧ نیسان، دەسکردە دانوسەنین وەرد محمد شیاع سودانی سەرۆک وەزیرەیل فیدراڵی، و باس بەرنامەیل حکومەتی، و جیوەجیکردن رێککەفتنەیل سیاسی وەگەرد چارەکردن گیچەڵەیل گیرهاتگ ناوەین بەغداد و هەولێر لەناوی کریا.
هەنی لە گردەوبوین چوارچیوەی هەماهەنگی بەشداری کرد، و گردەوبوین هاوپەیمان ئیدارەی دەوڵەت کە تا وەخت دیریگ وەردەوام بوی.
بارزانی دووپات لە ئارەزوو هەرێم کوردستان ئەرا چارەسەرکردن گیچەڵەیل و باوەتەیل گیرهاتگ وەرد حکومەت فیدراڵی کرد وەگورەی دەستوور وڵاتەگە.
هەمیش دانوسەنین وەرد خانمە باڵیۆز ئەمریکا و باڵیۆز فەرەنسا لە بەغدا وەڕیەو چگ.
سەردان نێچیروان بارزانی ئەرا بەغدا نیشانەیل خاس فرەیگ وەشوین خوەی هاورد، و دڵخوەشی جەماوەری پەیا کرد، وەگورەی قسەی چەودیاریکەرەیل.