شەفەق نیوز- سلێمانی

تەقینەوەیگ گەورە، شەفەق ئەمروو سێشەممە، ناوچەی تانجەرۆ لە سلێمانی شەکان، و دۊای ئەوە ئاگریگ فراوان کوڵپە کرد کە بڵویزەیل ئاگر وە مدوویەو بەرزەو بۊن ئەرا دۊرییەیل بەرزیگ و ئاسمان ناوچەگە رووشن کردن، لە وەختیگ تیمەیل وەرگری شارستانی و فریاگوزاری وەرەو شوینەگە پەلە کردن ئەرا کۆنترۆڵکردن ئاگرەگە.

 زانیارییە سەرەتاییەیل کە ئاژانس شەفەق نیوز دەسی کەفتگە خەوەر دان، کە تەقینەوەگە لە شوینیگ رۊ داگە کە ئەممارەیل و شمارەیگ لە ماشینەیل بارهەڵگر وە سزەمەنی لەخوەی گرێد، لەناو مەزەنەیل وە ئەوەگ تانکەریگ سزەمەنی لەناو شوینەگە تەقیە، بی زانستن مدووەیل رۊداوەگە تا ئیسە.

 سەرچەوەیگ ئاگادار ئەرا ئاژانس شەفەق نیوز وت کە "شمارەیگ لەو کەسەیلە کە لەو شوینە بۊنە تۊش سزیان هاتنە"، و دەسنشان کرد ئەرا نەۊین ئاماریگ فەرمی تا ئیسە لەباوەت شمارەی زەخمدارەیل یا بۊین گیانلەدەسداین.

هەمیش وت کە یەکیگ لە کارمەنەیل وەرگری شارستانی زەخمدار بۊ مەوقەی بەشداریکردنی لە پرۆسەیل کپەوکردن ئاگرەگە، لە وەختیگ تا وەخت دیریگ ئاگر لەناو بەشەیلیگ لە شوینەگە گڕ سەنورد.

 وەپای سەرچەوەگە، وەڕێوەبەرایەتی وەرگری شارستانی شمارەیگ گەورە لە تیمەیل ئاگرکپەوکردن و فریاگوزاری کل کردە ناوچەی رۊداوەگە، لەناو رخەیل لە فراوانبۊن رووبەر ئاگرەگە وە مدوو بۊین شمارەیگ لە ماشینەیل و تانکەرەیل بارهەڵگر وە سزەمەنی لەناو شوینەگە.

 دیمەنەیل لە ناوچەگە بڵویزەی ئاگرەیل خەسیگ نشان دان کە وەرەو ئاسمان بەرزەو بوون، لە وەختیگ دەنگ تەقیانەوەگە لە ناوچەیل دۊریگ لە شوین رۊداوەگە ژنەفیا.