ئه‌كبه‌ر له بڵاوكرياگيگ له‌بان لاپه‌ڕه‌ى تايبه‌ت خوه‌ى له ماڵپه‌ڕ كومه‌ڵايه‌تى فه‌يسبوك ك(شه‌فه‌ق نيوز)ئاگادارى بوى، وت: كار خواستيگه ك كار له‌بان دامه‌زرانن په‌يكه‌ريگ يادگارى بكريه‌ێد وه جوورێگ ك لايه‌ق بوود وه قه‌واره‌و قوربانيه‌يل گه‌وراى فه‌يليه‌يل.
ئه‌كبه‌ر باس له‌وه‌يش كرد و وت: ئه‌ميندار به‌غدا له مه‌سه‌له‌گه ره‌سيه‌سه‌وه‌و سووزدارى فريه‌يگيش نيشانداگه لهباوهت شه‌هيده‌يل كورد فه‌يلى و پيكهاته‌ى فه‌يليه‌يل خه‌باتكه‌ر و جه‌خت له‌بان پيشكه‌شكردن هاوكارى و گرينگى جيايگ كردگه له‌ى باوه‌ته‌و، وه‌تايبه‌ت گرينگيداين وه‌گشت ئه‌و كيشه‌يله ك په‌يوه‌سن وه ناوچه‌يله ك كورده‌يل فه‌يلى له‌تيان وجوود ديرێد و له‌وانه‌يش باسكردن مه‌سه‌له‌ى خوه‌ندنگاى فه‌يليه‌يل و خواست زينگه‌وكردن ئه‌و شوونه‌وار كلتوورى فه‌يليه‌و كيشه‌ى خوه‌ندنگاى جه‌عفه‌رى و چه‌ن كيشه‌يگ تر.
جى باسه، له‌ى باوه‌تيشه‌و، عسام ئه‌كره‌م فه‌يلى نويسه‌ر كورد فه‌يلى له باوه‌تيگى ك له(شه‌فه‌ق نيوز)بڵاو كريا ئاماژه وه په‌يكه‌ر شه‌هيده‌يل كورد فه‌يلى كرد و وه‌ى جووره باس كرد و وت:
دوياى 10 ساڵ له هه‌وڵ فريه‌يگ ئه‌را دامه‌زرانن په‌يكه‌ر شه‌هيده‌يل كورد كورد فه‌يلى، ئه‌و ته‌نيا يادگاريه ك باس له مه‌ويسى و مه‌ينه‌تيه‌يلمان ئه‌كاو ديداريگ وه‌ل نه‌خشه‌ساز و جيوه‌جيكاره‌گه‌ى كردم وه‌رجه چه‌ن ساڵێگ ك زويتر لهباوهت وه‌رين وه ته‌مامى باس سازكردنى كردمه‌و دوياى ده ساڵ له مه‌ينه‌تى، حكومه‌ت ئيسه بڕيار دا ئه‌و په‌يكه‌ر كورده‌يل فه‌يليه بخاده زبڵدان و به‌ڵكوو ميزخانه‌ى سه‌كرانه‌يل!! يه‌يش وه‌بى ئه‌وه‌گ كه‌سيگ بزانێد، وه‌بى وازكردن و وه‌بى ئاماده‌بوين، له ناوڕاس دو جاده ك بويه‌سه زبڵدان و شوون ميزكردن سه‌كرانه‌يل له جاده‌يگ لاوه‌كى پيس، ك شۆفڵ هات و بڕيگ زبڵ و پاشماوه‌و پيسى هه‌ڵگرت و بڕيگ خشت وكوچگ ئه‌رزانقيمه‌ت دانان و ئه‌و په‌يكه‌ر مێژوويى كورده‌يل فه‌يلييشه لاوريا!! يه‌يش جوور ئه‌وه‌گ رووڵه‌يلمان وه تيه‌ريكى كوشيا، ئمجا ئه‌يه‌سه به‌عس تازه ك ته‌نيا يادگاريه‌يلمان له تيه‌ريكى له‌ناو به‌ێد و ئى حكوومه‌ته ئه‌و ته‌نيا مه‌يدانيشه ئه‌رامان نه‌يشته‌و ك يادگارييگ شه‌هيد فه‌يلى له‌تى بنه‌يم. دى نازانيم و چوين و ئه‌ڕاچه ئى كرده‌وه ئه‌نجام درياگه، وه‌لێ تاوانه ئه‌نجام درياگه‌و ئى ره‌سميشه شايه‌تيده‌ره، منيش بانگه‌واز گشت كه‌سيگ ناكه‌م، به‌ڵكوو ئويشم: ئه‌ى ئه‌وانه‌گ ك تووزيگ غيره‌ت له‌لايان مه‌ندگه، ئه‌وه‌سه مێژوودان و قوروانيدان و شه‌هيده‌يلدان خريا ناو زبڵدانن، ئايا ئيوه فكردان چه‌س؟!!
