شه‌فه‌ق نيوز/ شماره‌ى ئه‌و گه‌شتياره‌يل بيگانه‌ ك روێ له‌ شار ئه‌سته‌مبوڵ كردنه‌ له‌ماوه‌ى په‌نج مانگ يه‌كه‌م ئمساڵ شماره‌يگ تازه‌ى په‌يمانه‌ييه‌ و ره‌سيه‌سه‌ نزيكه‌ى 5.5 مليۆن گه‌شتيار.

وه‌گووره‌ى ئاماره‌يل وه‌ڕيوبه‌رايه‌تى رووشنهويرى و گه‌شتيارى له‌ ئه‌سته‌مبوڵ ك له‌ى دواخره‌ بڵاويه‌و كرد، شماره‌ى گه‌شياره‌يل ك روێ له‌ ئه‌سته‌مبوڵ كردنه‌ له‌ناونى كانون دويه‌م و ئايار 2019 به‌رزبوينه‌وه‌ى وه‌رچه‌وه‌يگ وه‌خوه‌يه‌و ديه‌ وه‌ ريژه‌ى 11% وه‌ به‌راورد وه‌ل هه‌مان ماوه‌ له‌ 2018.

ئاماره‌گه‌ باس له‌وه‌ كرد گه‌شياره‌يل ك له‌و ماوه‌ى دياريكرياگه‌ روێ له‌ ئه‌سته‌مبوڵ كردنه‌ ره‌سيه‌سه‌ 5 مليۆن و 415 هه‌زار و 906 كه‌س ك 5,4 مليۆن له‌ليان له‌ڕێ ته‌ياره‌وه‌ چينه‌و باقيه‌گه‌يش له‌ڕێ ده‌رياوه‌.

ئاماره‌گه‌ يه‌يش ده‌رخست ك ئه‌ڵمانيا له‌ پله‌ى يه‌كه‌مه‌ له‌ ليسته‌گه‌ ك گه‌شتياره‌يلى روێ له‌ ئه‌سته‌مبوڵ كردنه‌و له‌شوون ئه‌ويش ئيرانيه‌يل و ئيجا رووسه‌يل و پله‌ى چواره‌ميش عراقيه‌يل بوينه‌ وه‌ى شيوه‌: 395 هه‌زار ئه‌ڵمانى، و 337 هه‌زار ئيرانى، و 291 هه‌زار رووسى, و 204 هه‌زار عراقى.