شەفەق نیوز/ دەسەی ئابووری و وەبەرهەمهاوردن پەڕلەمانی، ئمڕوو دووشەممە، داوای وەبەرهەمهاوردن جهانی کرد وەل کۆمپانیایل گه‌ورا، ئەرا چارەسەرکردن گرفت خراوی کەرت کەهرەبا، وئاماژەکرد وە شکست چارەسەری کێشەی کەهرەبا لە لایەن حکومەتەیل لەشوون یەک، لەبان بوودجەیل و پویلەیل فرە ک ئەرا وەزارەت کەهرەبا تەرخان کریاوید، و جەختکرد ک کەهرەبا کلیل چارەسەریە ئەرا ئەو باوەتەگان.
مازن فەیلی ئەندام دەسەگە ئەرا ئاژانس شەفەق نیوز وت؛ ئامارەیل دووپاتکەن لە خەرجکردن زیاتر لە ٤٠ ملیار دولار لە ری حکومەتەیل لەشوون یەک ئەرا چارەسەرکردن گرفتەیل کەرت کەهرەبا، و پویلەگان هەوا بردەیان، وفرەیان هانە گیرفان گەندەڵەیل، لەبان توانا وداهاتە داراییه‌ فرەگان، ک گومابوین وەبی چارەسەرکردن ٣٠% لە گرفتەیل کەرت کەهرەبا.
فەیلی جەختکرد لەبان گریەبەس وەل کۆمپانیایل جهانی گه‌ورا، ودەرفەت وەبەرهەمهاوردن وەپیان بدریەێد لە کەرت کەهرەبا و وزە، ئەرا کۆتایی هاوردن وەقەیرانیگ هەمیشەیی، ک چارەسەرکردنی ئاسانە، وئاماژەکرد له‌ باوەت کەهرەبا خوەی سەختیە زاقەو گرنگەگەس لە ماوەی ساڵەیل وەرین وخوەی کلیل چارەسەریە ئەرا گشت ئەو باوەتە خزمەتگوزاریەگان.
وتیش: کەرت کەهرەبا چارەسەرییگ لە ریشەو خوازێد ئەرا ویستگه‌ەگان وتوڕە داڕزیای وکۆنەگانی، و دوارە بونیادنان و ئامادەکردن وستان دابەشیەگانی وەشیوەی تەواو.
حکومەتەیل لە شوونیەک لە ساڵ ٢٠٠٣ شکست هاوردن لە چارەسەرکردن گرفت کەهرەبا و دابەشکردنی له‌بان دانیشتوەیل، بیجگە وەکارخستن کارگایل و کارەیل بەرهەمی، لەبان پویلەیل فرە ک وەزارەت کەهرەبا خەرجی کرد، ک بڕیگ چەودێر ئاماژەدەن ک گرفتە سەرەکیەگە سیاسیە لەپلەی یەکەم، وەگورەی بەرژەوەنی کەسەیل و دەوڵەتەیلیگ ئەنجام دریەێد، ئەرا چارەسەر نەکردنی، وقانجازکردن لە ئەو پویلەیلە ك ئەرای تەرخان کریەێد.