شەفق نیوز/ ئەدهەم ئیسماعیل نوێنەر رێکخراو تەندروسی جهانی لە عراق، ئمڕوو یەکشەممە، دووپاتکرد ک بەشیگ لە عراقیەگان هیمان بوین ڤایڕۆس کۆڕۆنا رەت کەن، ک هیلێد ژمارەی تویشهاتگەیل زیایەوبوود.

ئیسماعیل لە قسەیگی ئەرا ماڵپەڕ RT روسی وت: یەکەم هۆکار ئەرا بەرزەوبوین تویشهاتنەگان، خوەی نا پابەندی هاووڵاتیەیلە وە رێکارەیل قەیەغەگە ومقەیەتی لە مانگ رەمەزان تا ئیسە، وجیوەجی نەکردن کەرەنتین شارەگان وەشیوەیگ گورج لەلایەن دەوڵەت، ودویەم هۆکارەگە خوەی دابڕین شارەگان لەدەیشتەو، بەڵکم لەناوەو ژیان سروشتی ریکردیاد. وتیش؛ سێەم هۆکار بڕوانەکردن هاووڵاتیەیل ک ڤایڕۆس کۆڕۆنا هەس، وتا ئمڕوو هیمان بڕیگ ئووشن ڤایڕۆس کۆڕۆنا نیە.

ئیسماعیل ئاماژەدا ک پڕۆپاگندە هێشت مەردم وەشیوەیگ سروشتی رەفتار بکەێد، وسەردان یه‌كتر بکەن، وبونە دروس بکه‌ن . وتیش ؛ وەرگردن دەوڵەتەگە ئەرا تاقێگەیل نوو، تاقیەگه‌یل فرەوەکرد، وهەژمار نوو لە تویشهاتگەیل ئاشکرا کرد. هەمیش وت؛ رێژەی مردن لە عراق داوەزیا ئەرا ٣% ، وئیسە عراق ٢٢ تاقێگە دیرێد وەگەرد هەرێم کوردستان.

بەشیگ لە وەکارهاورەیل ماڵپەڕەیل پەیوەندیە گشتیەگان وتار وکورتە ڤیدیۆ بڵاو کردن ك باس ئەوە کەێد ک ڤایڕۆس کۆڕۆنا نیە، وبەشیگ جوور درویگ نیشانی دەێد، یا سیاسەت بازی، لەناوڕاس هوشداریەیلیگ ك دەسڵات داگەی لە خەمسەردی وەل بیماریەگە ک لە گشت جهان بڵاوبویە.