شه‌فه‌ق نيوز/ دوياى وه‌سه‌رچگن چه‌ن رووژيگ له‌بان په‌لاماره‌يل ريكخرياگ داعش، مه‌ردم ئاوايى(شه‌فه‌ق) له مه‌رزه‌يل قه‌زاى خانه‌قين له پاريزگاى دياله ده‌سكردنه چووڵكردن ئاوايه‌گه‌يان.
له‌ى باوه‌تيشه‌و، سه‌مير محه‌مه‌د نور سه‌رۆك شاره‌وانى له قه‌زاى خانه‌قين له لێدوانيگ رووژنامه‌وانى وت: له شه‌وه‌يل گوزه‌يشته‌ى كه‌ميگ ريكخرياگ تيرۆريستى داعش په‌لامار ئاوايى شه‌فه‌ق دانه له كنار ده‌رياچه‌ى ئه‌ڵوه‌ن له مه‌رزه‌يل قه‌زاى خانه‌قين و ئمڕوويش مه‌ردم ئه‌و ئاوايه ده‌سكردنه چووڵكردن ئاوايه‌گه‌يان.
نور هه‌ميش وت: ريكخرياگ تيرۆريستى داعش له مانگ گوزه‌يشت ده‌سكرده په‌لامارداين ئاوايى(ره‌مه‌زان كاكه‌يى)كوردنشين و مه‌ردمه‌گه‌يشى وه ته‌واوى ئاوايه‌گه چووڵ كردن و باس له‌وه‌يش كرد بارودوخ ئه‌منى له ده‌ورگرد قه‌زاگه خراوه‌و هيزه‌يل ئه‌منييش ك وجوود ديرن له ناوچه‌گه تواناى كۆنترۆڵكردنى نه‌يرن.