شەفەق نیوز/ نووسینگەی راگەیانن سەرۆک وەزیرەیل عراقی، ئمڕوو دووشەممە، راگەیان وه فەرمی فەرمان وسانن دوو مووچەیی و شایستەیل گیرهاتگەیل رەفحا دەرچگ ، و مەنینی تەنیا لەبان یەک کەس، ک مووچەگەی لە یەک مەلیۆن دینار فرەتر نەوود، و بایەسە خیزانەگەی لەناو عراق بوود و خاوەن خیزانەگە بوود، و هویچ مووچەیگ لە دەوڵەتەگە نەیاشتوود.
نووسینەگەگە بەڵگەنامە وەو فەرمانە بڵاوکرد، وەگورەی بەیاننامەیگ ك رەسیە ئاژانس شەفەق نیوز.
نووسینگەگە وت؛ ئەنجومەن وەزیران لە دانیشتن ئاسایی پەنجمینی ک لەروژ ٩/٦/٢٠٢٠ بەسیا وەیجورە بریاردا:
١ / خەرج کردن گیرهاتگەیل رەفحا بایەسە وەگورەی ئی نووسین یاسای (٣٥ ئەرا ساڵ ٢٠١٣ ) بوود وبەرزترین ئاست شایستەگان لە ١٠٠٠٠٠٠ دینار رەد نەکەێد ئەگەر ئی مەرجەیلە داشتوود:
ئ/ بایەسە گیرهاتگەگە نیشتەجی ئیسەی ناو عراق بوود.
ب/ بایەسە گیرهاتگەگە ئیسە خاوەن خیزانەگە بوود، وخەرجکردنەگە تەنیا ئەرا خاوەن خیزانەگە بوود، و ئەرا ئەو ئەندامەیل خیزانەگە خەج نیکریەێد.
ج/ لە وانەیگ مووچەیگ یا مووچەی خانەنیشینی یا بەشیگ خانەنیشینی یا هەر داهاتیگ تر لە دەوڵەتەگە وەرنێگرن.
د/ سودمەنەگە وەرپرسی وەرگردنەگەی هەڵگرێد لە پیچەوانەی تەوەرەیل ( ئ ، ب ، ج) ، ورێکارەیل یاسایی وەرانوەری بریەێد.
٢/ دامەزراوه‌ی زیندانیه سیاسیەگان ئەرک دووپاتکردن لە هەسی ئەو مەرجەیل باسکریاگە هەڵگرێد.
٣/ لە پێچەوانەی ئەوانەگ لە وەرین باسکریان، خەرجکردن مووچەیل خانەنشینی یا هەر شایستەی پویلی بڕیار دریاگە ئەرا گیرهاتگەیل رەفحا وسیەێد، ک لە یاسای دامەزراوه‌ی زیندانیه سیاسیەگان دانریاگە : ( ٤ ئەرا ساڵ ٢٠٠٦ ) خاسەوکریاگ وە یاسای ( ٣٥ ئەرا ساڵ ٢٠١٣ ) تا بانگەوازیگ تر.
٤/ دووپاتکردن لەبان مادەی ١٠ لە یاسای ٢٦ ئەرا ساڵ ٢٠١٩ یاسای خاسەوکردن یەکەم ئەرا یاسای مووچەی خانەنشینی یه‌کێتی ٩ ئەرا ساڵ ٢٠١٤ ، لەباوەت پویچەڵکردن گشت دەقە یاسایەگان ک ری وە گردەوکردن ناونی دوو مووچە یا زیاتر ده‌ن ، بیجگە ئەو چینەیلە کە باس کریانە.
لەی دویاییە ، خۆپیشاندانەیلیگ لە چەن شاریگ عراق ئەنجام دریا ، جوور ناڕەزایەتی لەبان بڕیار کازمی وە کەمەوکردن مووچەی ئۆپۆسزیۆن وەرین ئەرا رژیم سەدام حسێن، ئەویش وەگورەی یاسای کامپ رەفحا.
یاسای کامپ رەفحا لە کامپ رەفحا هاتگە ک کەفتیەسە ٢٠ کم دویر لە شار رەفحای سعودی، ک پێشوازی لە ئۆپۆسزیۆنەیل رژیم سەدام کرد دویای ساڵ ١٩٩١ ، وپشتگیرییان لە نەوەتەگان سەدەی گوزه‌یشته.
وەگورەی ئەو یاسا ک پەڕلەمان عراقی ساڵ ٢٠٠٦ داناگەی، هەرکەسیگ لەناو ئەو کامپە بویە ئەگەر لەماوەی یەک هەفتەیش بویە خوەیان وخیزانەیلیان، مووچەیل مانگانە کەفێدە دەسیان، تەنانەت ئەوەیگ کورپە بویە لەو وەختە گریدەو. وەگورەی یاسا، خه‌رج چارەسەری تەندروسی وه گشتی و خوەنەواری ئەوانە ها بان دامەزراوه‌ی زیندانیه سیاسیەگانه.
یاساگه ناڕەزایەتی جەماوەری گەورایگ له‌لی كه‌فته‌و، و پویچەڵ کردن ئەو شایستەیلە لە ناو بڕیگ داواکاری ناڕەزایەتیەگان بی دژ وە حکومەت وەرین عادل عەبدلمەهدی.