شه‌فه‌ق نيوز/ هه‌واڵه‌يليگ دزه‌وه‌پيكرياێ له‌باره‌ى ره‌سين فراكسيۆنه‌يل سه‌ره‌كى سياسى له عراق ئاشكرا كريا ئه‌را ريككه‌فتنيگ كووتايى وه‌ل مسته‌فا كازمى سه‌رۆك وه‌زيره‌يل راسپارياى له‌بان دامه‌زرانن حكومه‌ت وه‌ختى ئاينده.
وه‌گووره‌ى ئه‌و هه‌واڵه‌يله ك ره‌سيه‌سه شه‌فه‌ق نيوز، ئه‌وه ده‌ركه‌فتگه ك حكومه‌ت كازمى پيكهاتگه له 22 وه‌زاره‌ت، و كانديد ئه‌را وه‌كاربردن ئه‌و وه‌زاره‌ته‌يله له‌ناونى كانديده‌يل سياسى و سه‌روه‌خوه‌ى.
ئه‌و هه‌واڵه‌يله ئه‌وه ده‌رخه‌ن ك شيعه 11 وه‌زاره‌ت ده‌سى كه‌فتگه له‌ليانيش(ناوخۆ، نه‌فت، خارجيه، په‌روه‌رده له‌جياى خوه‌نين باڵا). وه‌ل ئه‌وه‌يشا هاوپه‌يمانى فه‌تح وه سه‌رۆكايه‌تى هادى عامرى 3 وه‌زاره‌ت بردگه و هاوپه‌يمانى سائيرون وه پشتگيرى موقته‌دا سه‌در 3 وه‌زاره‌ت و هاوپه‌يمانى نه‌سڕ وه سه‌رۆكايه‌تى حه‌يده‌ر عه‌بادى 2 وه‌زاره‌ت و ئئتلاف ده‌وڵه‌ت ياسا وه سه‌رۆكايه‌تى نورى مالكى 1 وه‌زاره‌ت و حزب فه‌زيله سه‌ر وه محه‌مه‌د يه‌عقوبى مه‌رجه‌ع شيعه 1 وه‌زاره‌ت.
باس له‌وه‌يش ئه‌كريه‌ێد پيكهاته‌ى سنى 6 وه‌زاره‌ت وه‌پيان ئه‌دريه‌ێد له‌ناونيان(خوه‌نين باڵا له‌جياى په‌روه‌رده)و دابه‌شكردنيان وه‌ى جووره: هاوپه‌يمانى هيزه‌يل وه‌سه‌رۆكايه‌تى محه‌مه‌د حه‌لبوسى 4 وه‌زاره‌ت، ئئتلاف وه‌ته‌نيه وه سه‌رۆكايه‌تى ئه‌ياد عه‌لاوى 1 وه‌زاره‌ت و مه‌شروع عه‌ره‌بى وه سه‌رۆكايه‌تى خه‌ميس ئه‌لخه‌نجه‌ر 1 وه‌زاره‌ت.
هه‌ر وه‌و گووره‌ى ئه‌و هه‌واڵه‌يله كورد و كه‌مينه‌يل په‌نج وه‌زاره‌ت كه‌فته‌سه پييان وه‌ى جووره: دووان له‌ليان ئه‌را پارت ديموكرات كوردستان ك پيكهاتنه له وه‌زاره‌ته‌يل دارايى و كاره‌با و يه‌كێتى نيشتمانى كوردستان 1 وه‌زاره‌ت و مه‌سيحيه‌يل 1 وه‌زاره‌ت و توركمانيش 1 وه‌زاره‌ت.