شەفەق نيوز/ وەزارەت ناوخۆی عراق، ئمڕوو سێشەممە، راگەیان کە پولیس رەسافەی بەغداد، توەنستیە ژنیگ بگرێد کە شویەگەی خوەی کوشتیە و ئەرا پارێزگایگ ترەک وایە، ئەوەیش وەماوەی 24 ساعەت لە جیوەجیکردن تاوانەگە.

دویەکە دووشەممە، سەرچەوەیگ ئەمنی ئەرا ئاژانس شەفەق نیوز وت: ئەندامێک لە وەزارەت ناوخۆ وە دەس ژنەگەی و دووس ژنەگەی لە باشوور بەغداد کوشیاس.

وەزارەتەگە لە بەیاننامەیگ ئمڕوو کە رەسیە ئاژانس شەفەق نیوز وت: رویداوەگە لە ناوچەی زاعفەرانیە "بوستان عەلاوی" بویە، کە هیزەیل ئەمنی ئاگاداری لە رویداو کوشتن کەسیگ وەرگردن.

 وەکوتپڕ مەفرەزەیل پولیس زاعفەرانیە رەسینە شوین رویداوەگە، و دەسکردن وە وەشکین و مینەکردن زویوەزوی و گردەوکردن زانیاری.

بەیاننامەگە وتیش: گومان پولیس کەفتە بان ژن قورلتیەگە لە کوشتنی، کە هیشت یەکیگ لە برایەیلی بگرن.

لەناو لێکۆلینەوە، ئاشکرا کردن کە خوەشکەیان شویەگەی خوەی کوشتیە، و دەسنریا بان ئەو دەوانچە کە وەپی کوشیاس.

 لەبان ئەوە، تیمەیل لە بەش پولیس زاعفەرانیە و دەورەیل پولیس و نویسنگەی دژە تاوان کەڕادە دروس کریا، و کەفتنە شوین ری ژنە توومەتبارەگە، و دەرکەفت کە وەرەو یەکیگ لە پارێزگایەیل وڵاتەگە چگە.

 وەگورەی بەیاننامەگە، هیزەیل ئەمنی وە هەماهەنگی وەرد کەرتەیل وەزارەت ناوخۆ لەو پارێزگا، توەنستن کوڵە ئەرای بگرن و دەسگیری بکەن.

 دویەگە سەرچەوەگە ئەرا ئاژانس شەفەق نیوز وت: ژنەگە وە کەینوبەینیگ وەرد دووسەگەی وە شەو شویەگەی لەناو خەو کوشتیە، و خوەی و دووسەگەی وەرەو شوین نادیاریگ واینە.