شەفەق نیوز/ سەرچەوەیگ ئەمنی، ئمڕوو دووشەممە، خەوەردا لە کوشیان و زەخمداری پەنج کەس، وە دوو رویداو هاتوچو لە پارێزگای نەینەوا.
سەرچەوەگە ئەرا ئاژانس شەفەق نیوز وت: سێ کەس وە رویداویگ هاتوچو ناوبەین دوو ماشین لەبان ری مووسڵ- تەلەعفەر، نزیک ناوچەی بادووش خوەرئاوای شار مووسڵ زەخمدار بوین.
سەرچەوەگە وتیش: دوو کەسیش کەفتە وەر رویداویگ تلیان نزیک چوارڕیان ناوچەی بوسەیف لە باشوور شار مووسڵ، لەبان ری مووسڵ – بەغداد، بویە هووکار کوشیان یەکیگیان وزەخمداری ئەوەکە.