شەفەق نیوز/ سەرچەوەیگ ئەمنی لە دیالە، ئمڕوو سێشەممە، خەوەردا ک ئەندامیگ لە پاسەوانەیل جیگر وەزارەت داد، لەناو مرافەیگ خیزانی لە ناحیەی جەلەولا کوشیا.
سەرچەوەگە ئەرا ئاژانس شەفەق نیوز وت: مرافەیگ خیزانی کەفتە ناوبەین خوەشک قوربانیەگە وەگەرد کوڕەگەی، تا رەسیە کوشتن پاسەوانەکە وە گولەی دەوانچەی خوارزاگەی.
وتیش: هیزەیل ئەمنی رەسینە شوین رویداوەگە، و توەنست بکوشەگە دەسگیر بکەن، و ئەرا لایەنەیل پەیوەندیدار هەواڵەی کردن ئەرا تەواوکردن لێکوڵینەوە و رەسین وە بندروس رویداوەگە.