شەفەق نيوز - بەغداد / سەڵاحەدین
سەرچەوەیگ ئەمنی وەرپرس، ئمڕوو جمعه، خەوەردا لە کوشیان کەسیگ و زەخمداری 20 کەس ترەک فرەیان ئیرانی بوینە کە ئەرا زیارەت مەزارگا پیرووزەیل چگنە، وە رویداویگ هاتوچو لە باکوور بەغداد پایتەخت.
سەرچەوەگە ئەرا ئاژانس شەفەق نیوز وت: رویداوەگە لە ئەنجام لەیەکدان ماشینیگ مەدەنی و پاسیگ بوی کە زیارەتکەرەیل ئیران هەڵگروێد لە ناوچەی تاجی باکوور بەغداد، دیاری کرد کە پاسەگە لە سامەڕا هاتوێد وەرەو کەربەلا.
وتیش: رویداوەگە بویە هوکار کوشیان کەسیگ و زەخمداری 20 کەس ترەک فرەیان زیارەتکەر ئیرانی بوینە، وتیش: تا وەخت نویسانن ئی خەوەرە ناسنامەی قوربانیەگە نەزانیاس.