شەفەق نیوز/ سەرچەوەیگ ئەمنی لە پارێزگای زیقار، ئمڕوو سێشەممە، خەوەردا لە کوشیان کەسیگ، و توومارکردن خوەیکوشتنیگ لەناوڕاس پارێزگاگە، و هەمیش ئاسایش نیشتمانی توەنست دویەتیگ رفیاگ لە بەغداد ئازاد بکەێد.
سەرچەوەگە ئەرا ئاژانس شەفەق نیوز وت: دەزگا ئەمنیەیل لە زیقار خوەیکوشتن گەنجیگ لە تەمەن ١٦ توومار کرد، هەنای خوەی لەناو ماڵەگەی لە قەزای ناسریە خوەی وەپەت هەڵوەسا، وەبی زانستن هوکارەیل خوەیکوشتنی.
سەرچەوەگە دیاری کرد ک رویداو پلیان ماتورسکڵیگ لە ناحیەی عکێکە باشوور شار ناسریە بویە هووکار کوشیان رانندەگەی وە کوتپڕ.
سەرچەوەگە وتیش: دویەتیگ لە تەمەن ١٥ ساڵان کەفتە وەر گولەی ویڵیگ دریا لە سەری ناوڕاس جادەی دوبەی لە قەزای شەترە.
هەرلیوا، دەزگای ئاسایش نیشتمانی عراق لە بەیاننامیگ رەسیە ئاژانس شەفەق نیوز وت: سکاڵا لەلایەن کەسوکار دویەتیگ خەڵک قەزای مەحمودیە رەسیە، ک بیسەروشوینە، و دویای مینەکردن و گردەوکردن زانیاری، دەرکەفت ک دویەتەگە لەلایەن دوو کەس رفیایە، و ئەرا پارێزگای بەسرە بریاگە.
بەیاننامەگە وتیش: ژوور ئۆپراسیۆنیگ هاوبەش ناوبەین وەڕیەوبەر ئاسایش نەحمودیە و بەسرە دروس کریا، وشوین دویەتە رفیایەگە کریا دی، تا مەفرەزەیلمان بتوەننن ئازادی بکەن و بڕفنەیل بگرن.