شەفەق نیوز - بەسرە

ئاژانس رۆیتەرز، ئمڕوو شەممە، خەوەردا لە وسیان بەرهەمهاوردن کارەبا لە وێستگەی کارەبای هارسە لە باکوور پارێزگای بەسرە، دویای ئەوەگ ئاگر لە یەکیگ لە لویلەیل گاز هیزگرد.

وەپرسەیل ئەرا رۆیتەرز وتن، ئاگرەگە رەسیەسە ماڵەیل نزیک وێستگەگە، و بویەسە مدوو وساننی لە کار، و دیاری کردن  وێستگەگە وزەی دیزاینکریاگی 800 مێگاواتە، و وەرجە هیزگردن ئاگرەگە نزیکەی 400 مێگاوات بەرهەم هاوردیاد.

تیمەیل وەرگری شارستانی توەنستن ئاگرەگە کۆنترۆڵ بکەن، بێ ئەوەگ زانیاری فەرمی خێرا دەربارەی مدووەیل یا قەوارەی زەرەدەیل دروس بوی لەلی بڕەسێد.

لە لای خوەیەو، وەزارەت ناوخۆ دووپات کرد کە مەفرەزەیل وەرگری شارستانی و وە پشتیوانی یەکە ئەمنییە تایبەتمەنەیل، لە ساعەت شەش شەوەکی ئمڕووەو لە ئامادەباشین، ئەرا مامەڵەکردن وەگەرد رویداو ئاگرەگە کە لەناو وێستگەی کارەبای گەرمی هارسە لە باکوور پارێزگای بەسرە هیزگرد.

رویداوەگە، وەپای ئامار سەرەتایی ناکۆتایی کە وەزارەت ناوخوەی راگەیانیەسەی، بویەسە مدوو گیانلەدەسداین چوار کەس و زەخمداربوین 35 کەس ترەک وە سزیان و خنکیان جۊراوجۊر، کە فرەیان لە دانیشتنگەیل ماڵە زیایچگەیل نزیک وێستگەگەن، و زەخمدارەیل ئەرا خەسەخانەیل کلکریان ئەرا وەرگردن چارەسەر پزیشکی هەوەجەکریاگ.

لە وەختیگ سەرچەوەیگ ناوخۆیی، ئەرا ئاژانس شەفەق نیوز خەوەردا، وەلای کەم  نزیکەی 40 قوربانی لەلی کەفت، 8 کەس گیانلەدەسدان و زیاتر لە 30 زەخمدار لە ئەنجام رویداوەگە بوی.