شەفەق نيوز/ سەرچەوەیگ ئەمنی لە پارێزگای کەرکوک، ئمڕوو جمعە، خەوەردا کە فڕۆکەیل عراقی F-16 زنجیرەیگ لە گورزەیل ئاسمانی وەبان حەشارگەی و میوانخانەیل ریخریاگ داعش لە قەزای داقووق وەدویری 50 کیلۆمەتر وەرەو باشوور پارێزگاگە جیوەجی کردن.

سەرچەوەگە ئەرا ئاژانس شەفەق نیوز وت: ئەو گورزەیل ئاسمانیە لە بنەمای زانیاریەیل هەواڵگری هویردیگ هاتن وەلایەن وەڕیەوبەرایەتی هەواڵگری سەربازی، دووپات لە روانگەکردن جموجویل ئەندامەتیی ریخریاگ تیرۆری لەناو میوانخانەیل لە ناوچەگە کردن.

 وتیش: ئەو گورزەیلە بوینە مدوو ویرانکردن بڕیگ لەو میواخانەیلە کە جویر پەناگە و بارەگایل ئەندامەیل داعش وەکار هاتیان، و عیمران ئامار کوشیاگەیل لە رزەیل ریخریایەگە نەزانیاس.

 لەلای خوەییش، شانەی راگەیانن ئەمنی لە فەرماندەی ئۆپراسیۆنەیل هاوبەش، جیوەجیکردن ئۆپراسیۆنیگ چینەیی راگەیان وەپی شانەیگ تیرۆری لە ناوچەی دووڵ چای لە کەرت سەڵاحەدین کردە ئامانج، ئەوەیش دویای رەنجەیل هەواڵگری و چەودیاریکردن هویرد تا ماوەی دوو مانگ وەردەوام.

شانەگە لە بەیاننامەیگ رەسیە ئاژانس شەفەق نیوز وت: ئۆپراسیۆنەگە لە بنەمای زانیارییەیل هویردیگ جیوەجی کریا کە کەفتنە دەس ئاژانس هەواڵگری و لێکۆڵینەوەی فیدڕاڵی لە وەزارەت ناوخۆ، وە پاڵپشتیکردن پیشەیی و مەیدانی لەلایەن شانەی وەئامانجگردن لە فەرماندەی ئۆپراسیۆنەیل هاوبەش، کە روانگەی جموجویل گرووپەیل تیرۆری وە درویژایی دویەشەو تا شەوەکی ئمڕوو کریا.

وەگورەی بەیاننامەگە، هیز ئاسمانی عراق گورزەیل ئاسمانی گەورەیگ جیوەجی کردن وە فرۆکەیل F-16 و فرۆکەیل سيسنا كەرفان، بەیتە مدوو ویرانکردن شوینەگە وە تەواوەتی، کە شانەیگ تیرۆری شەش کەسی خوەیان لەناوی قایم کردوین.