شەفەق نیوز - نەجەف

سەرچەوەیگ ناوخۆیی لە پارێزگای نەجەف، رووژ شەممە، خەوەردا لە دەسگیرکردن سێ ئەفسەر، کە یەکیگیان فەرماندەی فەوجیگە لە پۆلیس وزە، لەبان پەیاکردن دوو لۊلەی نەفتی کە لە پرۆسەیل قاچاخچێتی نەفت لەناو بووسانەیل ناحیەی حەیدەریە لە باکوور پارێزگاگە وەکار تیەن.

 سەرچەوەگە ئەرا ئاژانس شەفەق نیوز وت، کە لێکۆڵینەوەیل وەردەوام لەباوەت لۊلە ئاشکراکریاگەیل دەرخستنە کە دریژی لۊلەی یەکەم رەسێدە نزیکەی 500 مەتر، لە وەختیگ دریژی دۊەمەگە رەسێدە 3 کیلۆمەتر، و لە بووسانەیل ناحیەی حەیدەریە پەیا کریانە، لەبان ئەو ریە کە لە لای پارێزگای کەربەلا تیەێد، و لە ناوخۆ وە ناو ری "یا عەلی" ناسریاگە.

 دیاری کرد کە پرۆسەیل قاچاخچێتییەگە لەڕی ریڕەویگ لۊلە ئەنجام دریان کە لە بەسرەو دریژەو بوود و وە موسەننا و نەجەفا رەد بوود تا رەسێدە ئەنبار و قەزای حەدیسە، و دۆسیەگە کەفێدە ژیر لێکۆڵینەوەیل کە لیژنەیگ تایبەتمەن لە ئەنجومەن وەزیرەیل سەرپەرشتیی کەێد.

 لە وەختیگ زۊتر لە ئمڕوو، سەرچەوەیگ حکومەتی ئاشکرا کرد لەباوەت چەوەڕیکردن رەسین شارەزایگ نەفتی لە پایتەخت بەغدادەو، ئەرا وەشکین لۊلەیگ نەفتی کە هێزە ئەمنییەیل لە پارێزگای نەجەف پەیای کردنە، لە ناوڕاس گومانەیل لەباوەت ئەگەر وەکارهاوردنی ئەرا قاچاخچێتی نەفت خاو.

 لە ماوەی سەعاتەیل گوزەشتە، گرتەیگ ڤیدیۆیی لەبان ماڵپەڕەیل پەیوەندی کۆمەڵایەتی بڵاو کریا، کە هێزیگ ئەمنی نیشان دەێد لۊلەیگ لاوەکی پەیا کەێد کە لە کڕ لۊلەیل کلکردن نەفت خاو لە پارێزگای نەجەف دریژەو بۊە وەرەو یەکیگ لە بووسانەیل، ئەوەگ پرسیارەیل لەباوەت سروشت لۊلەگە و ئەو لایەنە کە ها پشت کیشیانی دروس کرد.

یەیش هاووەخت وەرد بۊین لیژنەیگ لێکۆڵینەوەی حکومەتی تیەێد کە سەرۆک ئەنجومەن وەزیرەیل عراقی عەلی زەیدی دروسی کرد، ئەرا لێکۆڵینەوە لە قاچاخچێتی نەفت، لە گشت ناوچەیل وڵاتەگە.

 لیژنەگە وەرجە یە پرۆسەیل قاچاخچێتی نەفتی لە ناحیەی جوڕف سەخەر لە باکوور بابل ئاشکرا کردۊد، و لەبان ئەوە بڕیار و ریکارەیل وەپەلە گردە وەر.

هەمیش لیژنە لێکۆڵینەوەگە سەردان پارێزگای کەرکوک کرد و دۊای ئەوە چگە سلێمانی و دویاخر تیمیگ ترەک چگە پارێزگای نەینەوا، ئەرا لێکۆڵینەوە لە پرۆسەیل قاچاخچێتی نەفت کە بڕیگی ئەرا ئیران تا رەسێدە ئەفغانستان، و ئەوانەی ترەک لەڕی دەروازەی سنووری رەبیعە وەرد سووریا ئەنجام دریانە.