شەفەق نیوز- نیویۆرک/ بەغداد
وەزارەت دەیشت ئەمریکی خەوەردا، کە سەرۆک وەزیرەیل عراقی عەلی فالح زەیدی و وەزیر دەیشت مارکۆ روبیۆ رێککەفتن، مەوقەی دیدارەیلیان لە نیویۆرک، لەبان گرنگی هەڵوەشانن ئەوەگ وە "میلیشیا تیرۆریستییەیل" وەسفی کرد، و ریگریکردن لە وەشانن پەلامارەیل لە خاکەیل عراقیەو، و جیوەجیکردن سەروەری عراق وە شیوەیگ تەواو.
وەزارەتەگە، لە بەیاننامەیگ فەرمی، وت کە روبیۆ چەوی وە زەیدی کەفت، ئەرا باس لە ئاییندەی هاوبەشی لە ناوەین وڵاتە یەکگرتگەیل و عراق.
وتیش کە هەردگ لایەن "رێککەفتن لەبان گرنگی هەڵوەشانن میلیشیا تیرۆریستییەیل لەلایەن عراقەو، و ریگریکردن لە پەلامارەیل لە خاکەیل عراقیەو، و جیوەجیکردن سەروەریی وە تەواوی".
دیدارەگە بەسیا لە پەراویز بەشداریکردن زەیدی لە گردەوبوینەیل خول هەشتا و یەکەم ئەرا کۆمەڵەی گشتی نەتەوە یەکگرتگەیل.
لە وەرانوەریش بەیاننامەیگ کە لە نووسینگەی راگەیانن سەرۆک وەزیرەیل دەرچگ، خەوەردا کە ئی دۊاییە دووپات کرد کە حکومەتەی کار کەێد لەبان چەسپانن پەیوەندییە عراقی ئەمریکییەیل و بەرزەوکردن هاوبەشی ستراتیژی لە ناوەین هەردگ وڵاتەگە، لەناو هاوکارییگ ئابووری بیناکەر کە بوارەیل کار هاوبەش فراوان کەێد و بەرژەوەندییەیل ئاڵوگۆڕکریاگ تونەو کەێد.
سەرۆک وەزیرەیل دووپاتی کرد لە رکداری حکومەتەگەی لەبان تەواوکردن ئەوەگ وە "شایستە سەروەرییەیل" وەسفی کرد، و وەردەوامبۊن لە رێکارەیل گیرهاوردن چەک لە دەس دەوڵەت، وەپەی پەیمانە دەستووری و یاساییەیل.
لە لای خوەیەو، روبیۆ، وەپەی بەیاننامە عراقییەگە، پشتگیری وڵاتەگەی نشان دا ئەرا عراق، حکومەت و گەل، لە چەسپانن سەقامگیری ناوخۆیی و وەردەوامبۊنی، و گەشەپیداین ئابووریی و تونەوکردن وازبوینب لەبان جەهان، لە شان پشتگیریکردن گامەیل حکومەت و بڕیارەیلی کە ئامانج دیرن لە تەواوکردن بنەمایەیل دەوڵەت و قایمکردن ئارامی و گەشەپیداین ئابووری.