شەفەق نیوز- واشنتۆن

وەزارەت دەیشت ئەمریکی، ئمڕوو چوارشەممە، دووپات کرد کە وڵاتە یەکگرتگەیل وەردەوامە لە کیشاننەوەی هێزە سەربازییەیلی لە عراق تا 30 ئەیلول/ سێپتەمبەر ئیسە، لە وەختیگ هەڵوێست خوەی دیاری نەکردیە لەباوەت پلانیگ کە وەپەی ئەوە پرۆسەی داگردن چەک باڵەیلە دریژەو بوود ئەرا ناوڕاس ساڵ 2027.

 قسەکەریگ وە ناو وەزارەت دەیشت ئەمریکی، لە جواو پرسیاریگ ئەرا ئاژانس شەفەق نیوز، وت کە واشنتۆن وەپەی خشتەی گواستنەوەی رێککەفتی لەبانی وەرد بەغداد وەڕیەو چوود ئەرا کووتاییهاوردن وە ئۆپەراسیۆنە سەربازییەیل هێزەیل هاوپەیمان لە عراق، و هویر خەێدە بان تەواوکردن کیشانەوەی هێزەیلی تا 30 ئەیلول، هاوەخت وەرد کووتایی راگەیانریاگ ئەرا ئۆپەراسیۆن "توانای رپ".

 وتیش کە ئی گواستنەوە رەنگدانەوەی گەشەکردن توانای هێزە ئەمنییە عراقییەیلە کەێد، کە هێزەیل پێشمەرگە لەناویانیە، و نۊنەرایەتی قۆناغیگ نوو کەێد لە پەیوەندییەیل ناوەین هەردگ وڵاتەگە.

 قسەکەرەگە نووەو کرد لە پشتگیری واشنتۆن ئەرا تەقەلایل سەرۆک وەزیرەیل عەلی زەیدی لە چەسپانن سەروەری عراق، و ریگریکردن لە پەلامارەیل لەناو خاکەیلی یا لەلیەوە، و دروسکردن هاوبەشییگ کە بەرژەوەنی هەردگ وڵاتەگە وەدی تیەرێد، وە دەسنشانکردن ئەرا ئەوەگ سەرۆک دۆناڵد ترەمپ راگەیانیەسەی مەوقەی پیشوازیکردنی لە زەیدی لە کۆشک چەرمگ رووژ 14ی تەموز/ یۆلیۆی گوزەشتە.

 پرسیار شەفەق نیوز پەیوەندی داشت وە ئەوەگ ئایا وەزارەت دەیشت ئاگادار کریاس وە نەخشەی کاریگ قۆناغی ئەرا دۊاخستن پرۆسەی داگردن چەک باڵەیل وە تەواوی تا ناوڕاس 2027، و ئایا وەیجۊرە دوینێد کە ئی وەختە گونجێد وەرد پابەندبۊنەیل بەغداد وە گیرهاوردن چەک وە دەس دەوڵەت.

یەیش دۊای ئەوە نیەێد زەیدی، لە دیداریگ وەرد رووژنامەی "نیویۆرک تایمز"، خەوەردا لە پلانیگ کە وە مەڵەتیگ دەس وەپی کەێد ماوەگەی 90 رووژە، و وەدۊای ئەوە پرۆسەی رادەسکردن چەک باڵەیل تیەێد، وە مەرجیگ تا 30 حوزەیران/ یۆنیۆی 2027 تەواو بوود، و حکومەت عراقی زویکردن یەکلاکردن دۆسیەگە بەسادەو وە کووتاییهاتن ئەرک هاوپەیمان ناودەوڵەتی لە 30 ئەیلول.

 وەدۊای دیدار زەیدی و وەزیر دەیشت ئەمریکی مارکۆ روبیۆ لە نیویۆرک ئی هەفتە، وەزارەت دەیشت ئەمریکی وت کە هەردگ لایەن رێککەفتنە لەبان گرنگی هەڵوەشانن ئەوەگ وە "میلیشیا تیرۆریستییەیل" وەسفی کرد و ریگریکردن لە پەلامارەیل لە خاکەیل عراقیەو.

 نویسینگەی راگەیانن ئەرا سەرۆک وەزیرەیل وت کە زەیدی لە دیدارەگە دووپات کرد لە رکداری حکومەتەگەی لەبان وەردەوامبۊن لە رێکارەیل گیرهاوردن چەک وە دەس دەوڵەت.