دەسەی کەشناسی عراق، کەشوهەوای وڵاتەگە لەی رزوژەیل بانانە راگەیا، و باس هەڵسان خوەڵوتووز لە کۆتایی هەفتەگە کرد.   

دەسەگە لە بەیاننامەیگ رەسیە ئاژانس شەفەق نیوز وت: کەشوهەوای سوو چوارشەممە، لە ناوچەی ناوڕاس نیمچە ئەورە کەمکەم پاکەو بوود، و لە ناوچەی باکوور نیمچە ئەورە وەگەرد دەرفەت نمە وارانیگ لە بەشەیل خوەرھەڵاتی، و لە ناوچەی باشوور  رووشنە وەگەرد لەکە ئەوریگ، و پلەی گەرمی لە ناوڕاس و باکوور نزیک رووژ وەرجە خوەیە، و لە باشوور کەمیگ داوەزێد.

وتیش؛ رووژ پەنجشەممە، لە ناوچەی ناوڕاس و باشوور نیمچە ئەورە، و پلەی گەرمی کەمیگ بەرزەو بوود، و لە باکوور ئەورە، و پلەی گەرمی لە بەش خوەرئاوای چەن پلەیگ بەرزەو بوود.

رووژ جمعە، لە ناوچەی ناوڕاس رووشنە وەگەرد لەکە ئەوریگ، و لە ناوچەی باکوور نیمچە ئەورە تا ئەور تەواویگ، و لە ناوچەی باشوور رووشنە تا نیمچە ئەورە، و پلەی گەرمی لە گشت وڵاتەگە بەرزەو بوود.

بەیاننامەگە وتیش: کەشوهەوای رووژ شەممەی ئایندە رووشنە وەگەرد لەکە ئەوریگ لە ناوچەی ناوڕاس و باشوور، و لە ناوچەی باکوور رووشنە تا نیمچە ئەورە، و خوەڵوتووز لە ناوچەی ناوڕاس و باشوور هەڵسێد، و پلەی گەرمی لە گشت وڵاتەگە چەن پلەیگ بەرزەو بوود.