شەفەق نیوز/ تیمیگ پزشکی پسپۆڕ لە خەسەخانەی واستی لە رەسافەی بەغداد، لە گلەوداین مەچگ بڕیاگ دەس چەپ پیاویگ لەناو تەمەن سی ساڵە سەرکەفت، ک لە پارێزگای نەجەف کەفتە وەر رویداویگ وە چشت تیژیگ.

دکتۆر عەباس محمد سەحن نەسراوی وەڕیەوبەر خەسەخانەگە لە بەیاننامەیگ لەلایەن تەندروسی رەسافە وت: تیمیگ پزشکی پسپۆڕ وە سەرۆکایەتی دکتۆر ئەسیر بورهان عامری توەنست نەشتەرگەری وە وەخیتگ پەیمانەیی ئەنجام بەێد، ک ژیان و جویلەی مەچگ بڕیاگ پیاویگ بارێدە شوین خوەی، وتیش: خەسەخانەگە وەرجەیە نەشتەرگەری جیاواز فرەیگ وە سەرکەفتن ئەنجام دایە.

دکتۆر ئەسیر بورهان عامری سەرۆک تیم پزشکی لە نەشتەرگەریەگە وت: بیمارەگە ها ناوڕاس تەمەن ٣٠ ساڵە، خەڵک پارێزگای نەجەفە، لە وەخت دیریگ لە شەو سەردان فریاکەفتن خەسەخانەگە کرد و گشت تاقی و وەشکینیگ ئەرای ئەنجام دریا، ئیجا چیە ناو نەشتەرگەری ئەرا گلەوداین دەس بڕیاگی، ک نزیکەی پەنج ساعەت وەپی چگ، تا سوخان و دەمارەیلی چەسپیانە یەکەو، و نەشتەرگەریەگە وە سەرکەفتن تەواو بوی.