شەفەق نیوز/ وەزارەت بیناسازی و نیشتەجیکردن عراق، ئمڕوو سێشەممە، ئاشکرا کرد کە عراق ساڵانە 200 هەزار یەکەی نیشتەجییوین خوازێد ئەرا چارەسەرکردن قەیران نیشتەجییوین، وتیش: وڵات دوو ملیۆن و 500 هەزار یەکە خوازێد تا وەتەواوی قەیرانەگە نەیلێد.

نەبیل ئەلسەفار، قسەکەر وەزارەتەگە ئەرا ئاژانس شەفەق نیوز وت: "جیوەجیکردن شارە نووەیل نیشتەجییوین بەشدار بوود لە داوەزیان نرخ یەکەیل  نیشتەجییوین، ستراتیجی وەزارەت بیناسازی و نیشتەجیکردن بریتییە لە دروسکردن فرەترین شمارەی یەکەیل نیشتەجییوین".

سەفار وتیش: "فرە لە فەرمانگە و تاکە ماڵەیل لە بازاڕ سیا دەسکردنەسە بازرگانیکردن بە ماڵەیل و یەکەیل نیشتەجییوین، لەوەر زیایبوین خوازینەیل نرخەیل بەرزەو بوینە".

وتیش: "زیایبوین خواست لەبان نرخەیل و بازرگانیکردن وە ماڵ بەشداربویە لە بەرزەوبوین نرخ یەکەیل نیشتەجییوین لە کۆمەڵەیەل و بازاڕ ماڵ، وەتایبەتی کە کەسەیلیگ بوینەسە بازرگان ماڵەیل لە ئەنجام دەسکاریکردن بازاڕ و بەرزەوبوین نرخ". دیاری کرد کە "ناتوانرێد دەسکاریکردن ماڵەیل کۆنترۆڵ بکرێد تاو فرەترین شمارەی یەکەیل نیشتەجییوین دروس نەکرێد، ئەراوە نرخ ماڵەیل کەمکەم داوەزێد".

سەفار ئاشکرا کرد کە "وەزارەت بیناسازی دەسوە گامەیل یەکەم شارەیل نیشتەجییوین کردگە، کە بریتییە لە قەرز و لەیەکفامسنن وەرد خەرجییەیل ئەرا دەسمیەتیدان فەرمانبەرەیل و هاووڵاتیەیل ئەرا وەدەسهاوردن یەکەی نیشتەجییوین، وتیش: 20% یەکەیل نیشتەجییوین ئەرا دەوڵەت گلەو خوەن، و وەبان کەسە شایستەبل بەشەو کریەن ئەرا چارەسەرکردن قەیران نیشتەجییوین".

وەگورەی قسەکەر وەزارەت بیناسازی و نیشتەجیکردن، وەپەی دویایین سەرژمار دانیشتگەیل، عراق دوو ملیۆن و 500 هەزار یەکەی نیشتەجییوین خوازێد، و وڵاتەگە ساڵانە 200 هەزار یەکەی نیشتەجییوین خوازێد ئەرا چارەسەرکردن قەیران نیشتەجیبوین.

دیاری کرد کە "لەلایەن حکومەتەو ریکارەیل فرەیگ جیوەجی کریانە ئەرا کۆنترۆڵکردن قەیرانی نیشتەجییوین، لەوانەیش کە زەوی وەپەتی نیەیریەێد وە بەرهەمهاورەیل، بایەسە ریژەیگ لە یەکەیل نیشتەجییوین بەێدە دەوڵەت ئیجا بەشەو بکریەێد وەبان 21 چین شایستە، کە بریتین لە فەرمانبەرەیل، خانەنشینەیل سەربازی، کەسوکار شەهیدان، ئەوانەگ هانە ناو تووڕ ئاسایش کۆمەڵایەتی  و ئەوانەی ترەک".

سەفار لە کۆتایی وتیش "لە چوارچیوەی ستراتیژییەت حکومەت نوو، 12 هەزار یەکەی نیشتەجییوین لە شار وەرد و 10 هەزار یەکەی نیشتەجییوین لە شار جەواهیری، کە ئەوەسا دریەنە دەس حکومەت ئەرا بەشەوکردن وەبان 21 چین شایستە، یەکەیل نیشتەجییوین لە شارە نووەیل بوود".