شەفەق نيوز- واشینتۆن
وەزارەت دەیشت ئەمریکا، ئمڕوو شەممە، دووپات کرد لە وەردەوامی نیگەرانی ئەمریکا لەو گرووپە چەکدارەیلە کە لەلایەن ئیرانەو پشتگیری کریانە، وتیش: بەشیگ لەو گرووپ و کەسەیلە پەیوەندی وە گرووپەیلیگ دیرن وە تیرۆرست دریانەسە قەڵەم.
ئەوەیش لە وەڵام پرسیاریگ لەلایەن ئاژانس شەفەق نیوز هات؛ کە ئایا ئەمریکا وەختیگ کۆتایی ئەرا حکومەت عراق دیاری کردگە تا ئەو باڵەیل چەکدارە لە وڵاتەگە بچەکنێد.
قسەکەر دەیشت ئەمریکا ئەرا ئاژانسەگە وت: ئیدارەی سەرۆک دۆناڵد ترەمپ هیمان نیگەرانە لەباوەت ئەو گرووپەیل چەکدارە کە لەلایەن ئیرانەو پشتگیری کریانە، کە لەناو هیزەیل حەشد شەعبی کار کەن، لەناویان کەسەیلیگ و گرووپەیلیگ پەیوەندی وە ریخریاگەیل بیگانە دیرن کە لەناو لیست تیرۆر توومار کریانە.
قسەکەر ئەمریکی وتیش: هیمان ئی گرووپەیلە دوسیان هاناو کارەیلیگ تونەڕەوی و بشیون ئارامی لە عراق، وتیش: وەردەوام گاڵ حکومەت عراق دەیمن ئەرا وسانن تونەڕەوی ئی گرووپەیلە و سزادانیان لەبان شکانن یاسایەیل عراقی.
لە وەڵامەگەی هیچ دووپاتکردنیگ لە (وەختیگ کۆتایی) فەرمی نەوی کە لەباوەت چەکانن باڵە چەکدارەیل دەریاسە بەغداد، کە دەر لەنوای مەزەنەکردن هەڵوێستەیل واشینتۆن لە یەکلاییکردن ئی باوەت ناسکە وە واز هیلێد.
لەی مانگەیل دویایبە، ئیدارەی ترەمپ زوور وەبان حکومەت سودانی هاورد ئەرا هەڵوەشانن یا تیکەڵکردن باڵە چەکدارەیل عراق، وەلێ راپۆرتەیل رووژنامەوانی وەدویر نەزانستن کە واشینتۆن مانگ تەممووز جویر مەوقەیگ کۆتایێ ئەرا یەکلاییکردن چارەنویس ئی گرووپەیلە دیاری کردوێد.