شەفەق نیوز - بەسرە

وەزیر نەفت باسم محەمەد خوزەیر عەبادی، ئمڕوو جمعە، راگەیان کە هەناردەیل عراق لە نەفت خاو لە مانگ تەمموز گوزەشتە رەسیەسە نزیکەی 49 ملیۆن بەرمیل، و دووپات کرد لەبان وەنواچگن لە پرۆژەی دریژکردن لەپلەی ئەرا هەناردەکردن لە پارێزگای بەسرەو لەڕی ناوچەی فیشخابوور ئەرا جویراوجورکردن دەروازەیل هەناردەکردن، وە تایبەت وەگەرد بەرزەوبۊن ئاڵووزییە ئەمنییەیل لە ناوچەگە و ریگریکردن لە زنجیرەیل دابینکردن وزە لەڕی گەروو هورمز.

یەیش لە کۆنگرەیگ رووژنامەوانی هاوبەش هات کە وەگەرد پارێزگار بەسرە ئەسعەد عیدانی بەسایەی، لە پەراویز گەردینیگ ئەرا شمارەیگ لە پرۆژەیل نەفتی و خزمەتگوزاری کە وەزارەت نەفت جیوەجییان کەێد.

 وەزیرەگە، لە کۆنگرەگە کە پەیامنێر ئاژانس شەفەق نیوز ئامادەی بۊ، وت، "قەیرانیگ لە گەروو هورمز هەس، وەلی ئومید دیرقمن لە رووژەیل ئایندە واز بوود".

 لە وەڵام پرسیاریگ لەباوەت دانوسەنین ناوەین بەغداد و تاران ئەرا ریداین وە رەدبۊن بارەیل نەفت عراقی لەڕی گەروو هورمز، عەبادی وت کە باج و باسەیل وەگەرد هەر یەک لە ئیران و ویلایەتە یەکگرتگەیل لەی باوەتە وەڕیەو چن،  وتیش کە چوار کەشتی هەڵگر نەفت هەن کە ئمڕوو نەفت خاو هەڵگردنە و هانە ری دەریاچۊن.

و ئاشکرا کرد کە ناوەنجی هەناردەکردن رووژانە ئەرا نەفت لە سەرەتای مانگ ئاب ئیسەوە تا ئیسە رەسیەسە دوو ملیۆن بەرمیل، و وتیش کە یە ئەرا یەکەمین جار لە عراق رۊ دەێد لە سەرەتای قەیران هەرێمییەگەو.

وعەبادی وتیش کە وەزارەت نەفت، وە نوێنەرایەتی کۆمپانیای بازاڕکردن نەفت "سۆمۆ" و کۆمپانیای نەفت بەسرە و کۆمپانیایەیل ترەک، وەرەو گریەبەسەیل بیوینەیگ چن ئەرا خەسەوکردن هەناردەیل، و دووپات کرد کە زیاتر لە 85% لە بودجەی دارایی وڵاتەگە پشت وە هەناردەیل نەفتی بەسێد.

 وەزیرەگە باس لەو سەردانە کرد کە شاند حکومی عراقی وە سەرۆکایەتی سەرۆک ئەنجومەن وەزیرەیل ئەرا ویلایەتە یەکگرتگەیل لە مانگ تەمموز گوزەشتە ئەنجامی دا، و وت: "ئیمە لە واشنتن واژوو لەبان رێککەفتنیگ کردیمن وەگەرد هاوپەیمانییگ کە کۆمپانیای شیڤرۆن و IT Capital و کۆمپانیای UCC قەتەری لەخوەی گرێد"، و دیاری کرد کە ئی هاوپەیمانییە پرۆژەی دریژکردن لویلەیگ لە بەسرەو ئەرا فیشخابوور جیوەجی کەێد، و پەلیگ لەلی دریژەو بوود ئەرا بانیاس.

 دووپات کرد کە ستراتیژیەت وەزارەت نەفت و حکومەت عراقی فرەجۊرکردن دەروازەیل هەناردەکردنە، و گەروو هورمز هەر وە یەکیگ لە دەروازە گرنگەیل ئەرا هەناردەکردن مینێدەو، وەگەرد جەیهان و دەروازەیل ترەک.

دیاری کرد کە ئی لویلە کە لە بەسرەو ئەرا فیشخابوور دریژەو بوود دابین کەێد، ئەرا یەکەمین جار، رەسین نەفت ئەرا گشت پاڵاوگەیل عراقی، و دۊای ئەوەیش فرەوکردن هەناردەکردن لە جەهانەو، وەگەرد بانیاس، و دووپات کرد کە ئی پرۆژە نوو نییە، بەڵکم پرۆژەیگ کۊنە، وەلی پەک کەفتگە وە مدوو رەوشەیل دارایی کە وڵاتەگە وەپیەو رەد بۊە.

 وەزیرەگە لە کووتایی  قسەیلی وت: " ئمڕوو ئیمە وەرەو ئی پرۆژە و پرۆژەیل ترەک چیمن ئەرا نووەکردن ژیرخانەیل لە ئاست بەرهەمهاوردن و هەناردەکردن، و فرەوکردن داهاتە داراییەیل و کیشانن دەسەکار".

لە لای خوەییشەو، پارێزگار بەسرە ئەسعەد عیدانی دووپات لە رکداری وەزارەت نەفت کرد لەبان گەشەپیدان کێڵگەی فەیحا و کێڵگە نەفتییەیل لە پارێزگاگە، و و عراق تەقەلا دەێد ئەرا دروسکردن توڕ لویلەیل فراوانیگ و بەرهکاری غاز هاوڕێ ئەرا رەسین وە پڕەوکردن هەوەجەی ناوخۆیی وە ریژەی 100% ئەرا دابینکردن وێستگەیل کارەبا و هەناردەکردن زیایە لە ئایندە لەڕی بەندەرە نیشتمانییەیلەو.